前有線主播劉明軒，早前獨家對《蘋果》透露同保險高層王傲山離婚原因，更大爆男方一年內三次趕自己出門口。(新聞連結：http://bit.ly/2d7ga6N )身為王傲山舊愛嘅李彩華(Rain)，之前都試過同呢位Ex隔空開火，對於劉明軒俾王傲山趕出家門，李彩華當時靚抽話：「咁又無話有冇沉冤得雪嘅，我從來都係正義嘅朋友，寧願人負我，我都唔負人。」32歲嘅Rain，日前喺有線節目《往事．並不如煙之情書》，就公開分享佢嘅兩段情。Rain喺節目中首先披露當年佢同林峯嘅戀情：「當年拍戲佢(林峯)對我呵護備至，我好快就知道佢對我有好感。記得有一場戲我跌傷咗，佢好擔心，放工仲打電話嚟關心我。佢知道我鍾意食嘢，就買好多零食畀我，無幾耐我哋就開始拍拖。當時係 puppy love，單純地喜歡大家，無諗太多將來。」Rain又指當年有見過家長，又大讚林峯屋企人好友善。可惜呢段關係只維持咗半年，隨着男方轉戰內地，呢段感情就不了了之。儘管覺得可惜，但Rain依然好大方祝福林峯搵到另一半，希望佢哋幸福美滿。經歷感情路上一波三折，Rain喺節目中就好欷歔咁話：「曾經覺得愛情係好真誠，但慢慢發現原來係好兒戲。」呢個時候，Rain話題一轉，輪到評價吓佢做「金融才俊」嘅前度，Rain話自己太後知後覺而俾人「劈腿」同公開指罵：「曾經有一次我出外工作，男友設法叫司機同女傭離開屋企，之後因為女傭太攰要返去，先發現原來屋企有另一個女人。原來一個外表斯文嘅君子，心底裡可以咁黑暗。」Rain笑言以前自己太天真，未了解清楚就同人拍拖，經歷感情傷痛令佢成長，唔會再輕易相信甜言蜜語。o依家嘅佢只希望搵到一個有共同信仰、善良嘅伴侶，可以穩定發展。
|
鍾意就快D Share啦！
|
|
|
