馮德倫返咗嚟香港喇！
中秋節團團圓圓喇喂！舒淇同馮德倫今個月3號，失驚無神喺布拉格拍攝電影期間宣布已婚，為大家帶來不少驚喜！而尋日，舒淇就喺捷克返港，不過，佢老公馮德倫就冇同佢行「孖咇」返嚟，留咗喺捷克工作做埋啲手尾，之但係，今日係中秋節，嗱～嗱～嗱～仲要係佢哋婚後第一個中秋節喎！馮德倫又點敢「失蹤」呢？！今日佢都喺捷克返咗嚟香港！
大約下午3點45分，頭戴Cap帽及黑超、滿臉鬍鬚嘅馮德倫好瀟灑咁一支公行出機場，冇行李跟身，而尋日佢老婆舒淇就冇戴婚戒，但馮德倫就有戴，仲要係好傳統咁戴喺左手無名指上面！
傳媒一輪嘴咁問咗好多問題，馮德倫就笑而不語，只係揮揮手同講：「中秋節快樂！」問到點樣求婚，佢就話：「所有嘢喺聲明講咗喇，唔講咁多！」問佢會唔會去度蜜月？馮德倫就擰擰頭。再問佢會唔會趕生仔？佢就答：「得㗎喇！」同老婆舒淇一樣唔答嘢嘅佢，一聽到另一半個名，都係忍唔住甜絲絲咁笑，新婚真係好鬼Sweet嘅啫！
而畀記者包圍嘅馮德倫，亦同太太舒淇尋日一樣，都係一度迷路！佢話：「死喇！我應該行邊？」馮德倫上車前仲話：「辛苦晒，唔該晒！多謝大家祝福，Thank You！」
來源 source: http://hk.on.cc
|
鍾意就快D Share啦！
|
|
|
