最近市面上出現一款被喻為「斷片酒」嘅美國有汽果汁酒，據知呢種酒含高咖啡因同12%酒精，而且有四種果汁味好易入口，畀人灌醉咗都唔知咩事！有個內地女子就質疑隻酒威力有冇咁勁，自拍咗段試酒片放上網，結果飲咗一罐就做出失儀嘅行為！
一向敢試、求真嘅無綫節目《東張西望》，繼之前主持黃耀英英勇人肉餵蠓，證明香港蠓患嚴重，獲網民頒咗個「英勇勳章」畀佢。今次又搵唔識飲酒嘅主持吳幸美親身試酒，同樣得到網民讚賞，不過都有部份網民唔信隻酒威力咁勁，覺得吳幸美表現浮誇，質疑佢係扮出來，仲話要親自試過先會信！
吳幸美試飲第一啖，佢話覺得似飲緊有少少酒精味嘅汽水。佢飲咗大約200毫升左右，等咗10分鐘左右，佢覺得有啲頭暈嘅感覺，血壓同心跳都有升高。過咗15分鐘吳幸美出現醉酒徵兆，情緒開始失控，喺鏡頭前傻笑完又喊，仲做埋陶大宇喺劇入面嘅招牌遮面動作，唔通佢係陶大宇嘅忠實fans？網民見佢情緒失控，覺得似撞鬼：「勁似怪談畀鬼上身！司徒法正師傅：出事出事！」
20分鐘之後吳幸美仲進入昏睡狀態，工作人員點叫佢都叫唔醒，網民搞笑話：「要用震撼的聲音先可以叫醒佢！」其實都唔使震撼嘅聲音，過多15分鐘吳幸美慢慢醒番，不過個人仲係呆呆哋，工作人員慰問佢，佢都好似唔識畀反應。酒氣過晒之後，吳幸美講述試酒感覺，佢表示知道自己又笑又喊，又知有好多工作人員行嚟行去，不過之後發生咩事就唔記得隻酒真係勁到咁！吳幸美今次以身犯險，以「過來人」身份呼籲女士們唔好亂試。段片出街之後熱爆網絡，上載不足一日已經有近百萬人次瀏覽。
網民有話兒
Kaxsxn Lxx：其實女主持都係打份工，原意係以第一身角度提醒女仔，特別係冇飲開酒嘅人唔好試，點解要用質疑嘅態度去批評個女主／節目？
Fx Chxx：控制唔到自己，大笑大喊都仲記得對住鏡頭做表情，只能講佢真係好專業。
Mxi Chxx：無論真定假都好，其實佢哋個出發點都係叫人小心啲，唔好飲太多，以免有事發生。
Pixxy Chxx：東張西望講咗工作人員將佢安全送到家中畀家人先離開的，又點會失身，佢事後都話知道自己又喊又笑，但控制唔到，而醫生都話咁勁既酒，血液一下衝上腦，其實好傷大腦，大家少飲為妙！！
|
鍾意就快D Share啦！
|
|
|
