熱爆娛樂: 求殺蟲水贊助　 E-Kids重組開騷　樂壇小強進化做飛曱甴 [壹週刊

2016年9月1日星期四

求殺蟲水贊助　 E-Kids重組開騷　樂壇小強進化做飛曱甴 [壹週刊 - 1382] __,E-Kids,M1,

Alan同阿 Tim教跳舞，再次又跳又唱應該應付到。但脹咗成個碼的 Tommy仲跳唔跳得，佢話：「幾個月前操番，跳到面青口唇白。」

娛樂偵訊

求殺蟲水贊助　 E-Kids重組開騷　樂壇小強進化做飛曱甴

02年埋班的 MK-POP始祖男子組合 E-Kid，一頭金毛 MK味，粉絲照受；後因內訌幾年貨仔就解體，不相往來。事隔十多年，最近忽然破冰，三人更大爆當日和頭飯過程。

放低恩怨，重組開騷，更計劃將成員樂壇小強 Tommy進化成飛曱甴，呼籲殺蟲水公司做贊助商。

充滿鑊氣

出道時有校長譚詠麟帶住。一頭金髮，被標籤為 MK組合，依然多粉絲，商場騷唔憂做，當年係樂壇奇葩。

當年 E-Kid的 Tommy（阮民安）因為唔妥另外兩個成員阿 Tim（郁禮賢）及 Alan（林詠倫，又名林泳），反枱後十幾年來冇來往。不過娛樂圈冇永遠敵人，在前經理人文滌拉線下，三人可以坐低商量重組。

曾經面阻阻的 E-Kid，今日合體嘻嘻哈哈做訪問，講到一齊坐低食「和頭飯」，阿 Tim爆稱全程充滿火藥味，似是 Tommy同 Alan攤牌飯局多啲。

「我哋約咗喺文滌公司附近間餐廳見面，嗰日我遲到，去到見到佢哋已經火藥味好重， Tommy係咁手指指篤住 Alan。當時心諗，未正式開始（重組）就咁！不過我冇走，坐低先叫咗碟牛腩飯食，之後氣氛又緩和咗，佢兩個講吓講吓就 friend番。」 Tim說。

這餐充滿鑊氣的「和頭飯」，正是本去年底，撞破他們見面的同一餐，當時 Tommy同 Alan的確講到好激動，其間，經理人文滌更指住 Tommy訓話。

大家講清楚

問 Tommy當日點解會咁扯火？他說要三口六面講清楚。

「要重組，就必須要搞番清楚件事。直到呢刻，我唔需要同你假，同埋一見到 Alan，就諗番起一二年佢兩個開演唱會講嘅嘢，我梗係唔開心。以前有心病，係咪唔 like焦點總落喺我身上。」至於 Alan，亦在「和頭飯」一五一十向 Tommy解釋，大家成功破冰。

過去 Tommy因為頻傳欠債，形象插水，近年更被冠以「樂壇小強」。大家再合作，亦因為 Tommy改變了不少。

「再接觸番 Tommy，覺得佢有紋有路咗。（ Tommy：八點唔會當九點。）有朋友知我哋要重組，都提我要小心佢。（ Tommy再插嘴：講到我有伊波拉病毒咁。）同佢傾番咁多次偈，我可以好理直氣壯咁同其他人講，佢真係變咗好多，認真咗，唔再信口開河。」 Alan說。

兄弟對自己改觀， Tommy亦認衰，覺得自己抵死。「我係做過好多錯事，亦要承受後果，我抵死嘅！但唔知點解，自己成日俾人擺喺一個位置，覺得我好想喺個圈發展，又話我係樂壇小強死極都死唔去。我有唔開心，但好在依家兩個兄弟明白我，再一齊玩，好感動。」 Tommy說。

雖然當日不相往來的他們終破冰，但飯後 Alan孖阿 Tim同行， Tommy則捉住文滌傾。

上年底，重組前的 E-Kid與前經理人文滌食和頭飯， Tommy同 Alan一坐埋就開火。

想搵黑旋風

「曱甴可以死好多次，我哋度緊個重組演唱會，玩吊威吔，將佢進化變飛曱甴。」阿 Tim講完，三兄弟笑到碌地。

「睇成本，有咪用威吔做飛曱甴，冇咪用兩條魚絲拉囉。」 Alan說。「咁玩刺激啦啩！可能會斷，隻曱甴會跌。有冇見過有殺蟲水公司做贊助，有得諗喎。唔使用劍，黑旋風就得嘞嗰啲呢……代言人可以由我嚟做。」 Tommy自嘲。