熱爆娛樂: 演技大躍進狂加戲份　王君馨姣上位 KO蔡思貝 [壹週刊

2016年9月15日星期四

演技大躍進狂加戲份　王君馨姣上位 KO蔡思貝 [壹週刊 - 1384] __,蔡思貝,王君馨,君馨,M1,

娛樂偵訊

演技大躍進狂加戲份　王君馨姣上位 KO蔡思貝

喺劇集《城寨英雄》中經常要踩住三吋高跟鞋打功夫，又要大騷白滑玉背兼二十吋半「黃蜂腰」嘅「花曼」王君馨（ Grace），打得又剝得，終於成功姣上位！

入行九年，終於有代表作，大台即時食住個勢谷佢上位，喺新劇《心理追兇》只係做女二嘅王君馨戲份唔多，但《城寨》播出之後，公司下旨要大幅度加戲，戲份即時變到同女一蔡思貝平起平坐，仲要升呢襯「筍盤男神」馬國明演一對，向女一邁進一大步！

無擺「阿姐款」

上週五（九月九日），王君馨現身旺角拍攝一場暗殺蔡思貝戲份，現場所見，王君馨未有因上位而擺「阿姐款」，對上上下下工作人員都照顧有加，唔會大細超。

成日被指演技唔掂嘅蔡思貝，當日要演「被殺」場面，唔知係咪因為角色戲份太難演關係，起初她對住劇本愁眉苦臉，鬼妹仔性格嘅王君馨見狀即主動上前擁抱安慰，又陪思貝齊齊對戲，令緊張到爆嘅思貝有番啲笑容，之後二人仲玩到攬埋一舊作狀互嘴。

憑住花曼一角爆紅，王君馨喺新劇《心理追兇》即獲加戲份，同女一蔡思貝平起平坐。

兩 take搞掂

到正式埋位時，進行暗殺行動嘅王君馨戴住口罩，混入幾十個臨時演員中，得雙眼露出嚟都 feel到佢股殺氣。導演嗌 action之後王君馨即刻衝向蔡思貝，再用道具刀一嘢插落佢肚皮，動作乾淨利落，蔡思貝隨即倒地，同一時間，馬國明就出手將王君馨制服，並撕開其口罩，被識穿身份嘅王君馨歇斯底里地大叫再狂奔亂撞，演出七情上面，拍咗兩 take導演就收貨！

上週五（九月九日），王君馨見對手蔡思貝愁眉苦臉，即上前擁抱安慰。

王君馨同蔡思貝連試戲都交足功課。

正式 roll機，馬國明出手撕開王君馨口罩，王君馨發狂大叫。

王君馨拍攝逃跑戲份時七情上面，但導演一嗌 cut機即笑唔停。

一身血漿嘅蔡思貝隨即倒地，呢場戲終於唔使 NG。

食住個勢，新戲《心理追兇》中，王君馨升呢同「筍盤男神」馬國明做情侶。

挑戰強姦戲

現年三十歲的王君馨，○七年參選港姐奪得亞軍而入行，早年曾經因為拍飲食節目搞到患上暴食症，拍《飛虎 II》時，右腳韌帶仲搞到九成撕裂，為咗工作，王君馨一向唔錫身。「其實 Grace一向都好搏，叫佢性感又唔扭擰，所以好多導演都鍾意搵佢，早幾年佢啲戲都屎㗎，又誇張，不過呢幾年佢的確進步咗好多，拍《城寨英雄》嗰陣同對手打到傷哂都無怨言頂硬上，今次呢套新劇 Grace繼續會有性感，仲會有強姦戲，又要殺人，好有發揮！」一名幕後人員說。

「花曼」王君馨在《城寨英雄》中大騷白滑玉背。

為咗花曼一角，王君馨每日穿著矯形塑身衣，箍出 20.5吋小蠻腰。

男友求婚

戲中「花曼」王君馨同「牙佬」袁偉豪喺劇中不能開花結果。不過現實中，王君馨嘅感情世界就無咁悲慘，佢同身處美國的男朋友就有段長達十一年的愛情，捱過「七年之癢」後感情非常穩定，最近王君馨仲暗示男友已經求咗婚。

「雖然係異地戀， Grace同男友每年先見得兩、三次，不過佢哋 keep住會 FaceTime，佢男朋友已經求咗婚㗎喇，但聽 Grace講之前佢哋因為邊個搬去邊度有爭執，先未有實質行動。而家 Grace事業開始有起色，梗係想留喺香港繼續發展啦，好彩佢男友最後都好明白，所以就決定喺紐約返嚟香港搵份工，之後就盡快結婚！」王君馨身邊人說。