娛樂偵訊
英皇錫晒霆鋒陳偉霆 樂易玲氹孤兒仔林峯歸隊
失意視帝劈炮離開無綫，全身轉投英皇的林峯，傳被封殺兩年來絕跡大台，但早前出席楊怡羅仲謙婚宴，卻突然可以在《東張西望》出鏡。
簽約英皇以來，因為公司資源集中在謝霆鋒及陳偉霆身上，承諾林峯開戲的期票，一直未有兌現。近日憑電影《使徒行者》大收七億省靚招牌的樂易玲，即把握時機發功，第一步是落令解封，又力邀林峯出席邵氏電影晒冷派對，鋪路氹「契仔」歸隊。
開戲全部冇份
在無綫十五年的林峯一直希望在電影方面打出一條路，據了解，當日答應過檔英皇，也是因對方承諾會開戲力捧，不過兩年過去都未開齋，就連客串一角也沒有。
「其實阿峯根本冇諗過要做男主角，佢知道自己喺電影係新人，只希望泊到個大碼頭，可以同有分量演員合作學嘢，就算做男二男三都冇所謂，舊年古仔（天樂）搵楊生（受成）傾過話開《尋秦記》電影版，最後又冇咗下文。
「英皇近兩年開嘅戲全部都冇佢份，就連啱啱喺記者會宣布開拍嗰幾部大片，都係霆鋒同 William（陳偉霆）孭飛，另一部就係阿 Sa同葛優，部部都唔預佢，梗係唔開心。」知情者說。
可自擁山頭
過去兩年，林峯出過一張唱片和今年四月開了三場演唱會，其餘大部分時間都在內地拍劇。
「阿峯喺內地有市場，今年拍咗套內地劇《六扇門》，佢就袋咗過千萬人仔。」
堅持離巢惹無綫封殺，不過跟樂易玲關係依然密切，完全變英皇人後，林峯照舊俾面去對方生日 P。一直想留低林峯的樂大媽，眼見「契仔」被忽略，於是密謀氹他回巢。
為表誠意，率先解除封殺令，再邀林峯出席十月中舉行的邵氏大型活動。
「《使徒行者》電影版收得之後，負責監製嘅樂大媽成個人都生晒。喺英皇，點都爬唔過霆鋒，大媽覺得係時機，阿峯同公司仲有一年約，傾得嚟就差唔多。如果成事，阿峯可以好似王祖藍咁，有自己工作室，開自己嘅 label，所以都心郁郁㗎。」知情者說。
大細超
猛虎不及地頭蟲！英皇旗下不乏藝人，但始終以飲英皇奶大嘅佔有優勢，尤其謝霆鋒，因為特別得老闆楊受成器重，因而惹來其他同門葡萄。
撰文、攝影、攝錄：娛樂組
|
鍾意就快D Share啦！
|
|
|