熱爆娛樂: 未講掂數　大台唔出工作證　亞軍劉穎鏇「被遣返」美國 [壹週刊

2016年10月27日星期四

未講掂數　大台唔出工作證　亞軍劉穎鏇「被遣返」美國 [壹週刊 - 1390] __,大台,劉穎鏇,TVB,M1,

娛樂偵訊

未講掂數　大台唔出工作證　亞軍劉穎鏇「被遣返」美國

今屆港姐冠軍馮盈盈當選後爆粗成功搶到人氣，就算事後即時被高層照肺，依然有機會出席活動 keep住曝光，反而網民勁 like的亞軍劉穎鏇自 9月中做完港姐官方活動就開始消失；事出有因，原來她拒簽長約，大台於是以「未申請到工作證」為由，下令她暫時停工。今年升讀大學二年班的劉穎鏇，自願被遣返美國。

台慶亮燈冇份

往年無綫台慶亮燈儀式，應屆出爐港姐例必出席做人肉布景，不過今年亞軍劉穎鏇卻影都唔見。據了解，自從上月十四號出席領獎活動，一直「失蹤」至今。

「其實 Tiffany（劉穎鏇）已經好耐冇出嚟，唔單止台慶亮燈，就連中華小姐宣傳活動都見唔到佢。聽講公司早排要佢簽多一份五年約，但 Tiffany覺得長，所以心大心細仲未有決定簽定唔簽。佢喺美國出世，冇香港身份證，要正式開工就要有 working visa，公司見佢唔聽話，咪大條道理叫佢唔好開工。」一名無綫人說。

劉穎鏇跟上屆亞軍龐卓欣都在外國長大，無獨有偶都不喜歡被長約綁死。

早前無綫為來年國際中華小姐選舉搞宣傳活動，今屆港姐只有馮盈盈（中）、季軍陳雅思（左）以及友誼小姐張寶兒（右）出席。

返美國讀書

大台一貫作風，去年的亞軍龐卓欣，便因拒絕加簽長約，被無綫掟入雪櫃，但有個富貴老豆撐腰，她亦樂得無 job，周圍旅行轉做 blogger分享扮靚心得。

「 Tiffany想入娛樂圈做戲同做主持，所以的起心肝減咗十幾磅選港姐，佢亦有諗過做 model，不過一日未落筆簽約，就乜都唔使傾。反正屋企人同男友都喺美國，所以 Tiffany最後決定先返去美國讀書，見步行步。其實公司同樂小姐都有叫佢唔使咁急返美國，不過 Tiffany得十九歲女，一個人喺香港，又冇工開，留响度日日都唔知做乜，加上掛住屋企人，嗰段時間佢好唔開心。」一名無綫人說。

已經返美國半個月的劉穎鏇，重拾學生生活，冇壓力心情馬上靚番晒！