一撻即着再轟梁錦松倡普通話 趙學而梅小惠不和13年由得佢過咗去
【《蘋果》專訪】
唱歌拍劇為尋開心的趙學而，11年前逃離無綫後自由接工作，拍劇不是一貫睇開的大台，自資出靚聲碟講口碑不須宣傳；從來不是鹹魚的學而，今年44歲終等到開處女騷的機會，門票僅六分鐘被秒殺；學而不甘做倒模藝人，貼地的她為撐廣東話再寸爆前高官梁錦松，但卻避談13年前傳跟梅小惠反面：「由得佢過咗去！」
■44歲的趙學而離開無綫後以自由身接工作，下月舉行處女騷門票被秒殺炒賣，證明現仍有很多識貨之人。攝影：沈健程
■學而自嘲為人衰口直心快，不懂得口甜舌滑，以前經常因此影響工作機會。
■學而在《皆大歡喜》扮演林玉露大受歡迎，但卻跟梅小惠不和傳足13年。資料圖片
■學而捍衞廣東話再寸梁錦松：「你不如轉世投胎做第二世人。」資料圖片
在娛樂圈默默捱了20多年的趙學而，年過30的中女中男，必定聽過她的《尋開心》、《每隔兩秒》、《自欺欺人》等歌曲；看過她在長壽劇《皆大歡喜》扮演尖酸二少奶林玉露，學而等了超過七億秒，終等到下月假Star Hall舉行處女騷「我趙學而演唱會」。日前她在觀塘接受本報專訪，對於自己未上過一線，淡然說：「呢個世界好多唔同崗位，如果個個歌手都着到聖誕樹，個個都喺紅館開騷，其實倒模一樣，我諗樂迷都唔係好想見到呢個現象，我反而覺得有唔同類型歌手畀大家選擇，開心過喺紅館開party。」
■學而近年轉戰內地接騷，又自資出發燒碟，幫港視拍劇，工作得好開心。微博圖片
■學而多年來身材不變，依舊瘦削。
「我好火爆」學而於05年拍完《皆》劇後逃離無綫，以自由人身份在內地和香港接工作，四年前復出簽港視拍《第二人生》，她說：「經歷好似輪迴七世人，起起跌跌高高低低又病過又好番，我諗呢個過程好切合香港人打不死精神，尤其娛樂圈。」因為不擦鞋不埋堆？學而直認：「我個人衰口直心快，唔識口甜舌滑，尤其以前細個講咗先算，可能令到人哋唔開心。」
02年學而拍《皆大歡喜》時，有傳因她屢次遲到而遭梅小惠指摘，決裂至今13年，學而對此說：「呢啲嘢過咗去唔想再講，由得佢過咗去，工作上做到大家要做嘅就OK。」問曾否被人欺負？學而笑說：「應該有，但唔記得，好多人覺得我好火爆，我係一點就着，但燒完就冇嘢，過咗去就算。」
近年學而經常在網上蒲頭，很貼地關心社會，曾在facebook寸梁錦松「香港學校要用普通話教中文」的言論，學而提到此事一撻即着：「我唔係刻意針對某個人，而係某啲事情我哋需要堅持，最令我激動係講廣東話問題，一個香港長大、土生土長香港人，竟然話廣東話唔係自己母語！自己支火柴即刻着，我會覺得你點可以將自己一直以嚟嘅成長，好似粉筆字抹晒，你不如轉世投胎做第二世人，譬如你係一個潮州人，你喺潮州出世，由細到大講潮州話，你依然係撐潮州話㗎，唔可能話唔可以用潮州話，去到邊度都一樣。」
「自己方言」學而認為中國地大物博，每個城市都可能有自己方言：「點解唔可以堅持自己地方語言呢？我覺得呢件事好奇怪，我哋由細到大聽廣東歌睇港劇，全部都係廣東話，忽然間開電視全部講普通話，你都會覺得奇怪，雖然鐵一般事實，香港地講普通話人越嚟越多，但呢度始終係香港，開埠以嚟都係講廣東話，就係咁簡單。」
撰文：余燕儀
場地提供：Comic park and cafe（Mega Box）
服裝提供：Matt Hui
|
鍾意就快D Share啦！
|
|
|