作為正式比賽足球場，國際足協就早有各種規定，否則點可以作賽先？不過，遠喺阿根廷第5級聯賽球隊蘭尼亞斯嘅主場，卻原來自1987年啟用至今，足足踢咗30年，近日先畀阿根廷足總發現係唔啱規格，唔只球場兩邊半場長度不一，仲要根本唔係一個長方型，問你死未？
據阿根廷足總嘅調查報告發現，原來呢個球場兩邊半場，其中一邊係長54米，另一邊係48米，足足相差6米。更大鑊係從最近拍攝一張球場鳥瞰圖睇，先發現球場根本係呈現成一個不規則四邊型，大佬，點比賽呀？
蘭尼亞斯個會長馬些路高美斯就堅稱話個球場踢足30年都未有過問題，曾經同過阿根廷名將泰維斯做隊友嘅前蘭尼亞斯球員沙維奧富尼迪斯，仲話自己自細喺度踢波，射入不知幾多世界級靚波添！至於球隊現役前鋒卡斯坦奴就話對手只係會笑佢哋個場古怪，但就未嘗投訴過咁話！
當然，有專家就分析，呢個騎呢球場設計其實對進攻球員影響不大，但對門將就會有影響。點都好啦，阿根廷足總就勒令蘭尼亞斯要喺今年12月15日前搞番掂個球場，否則可能要永久關閉喎！
SO東波同你追實體壇每個精彩時刻！
http://on.fb.me/1PWMCFH
來源 source: http://hk.on.cc
|
鍾意就快D Share啦！
|
|
|
