依家華置幾乎由甘比姊妹打骰，甘比(陳凱韻)30歲嘅細妹陳諾韻去年7月升為執董，與36歲、出任華置行政總裁嘅大家姐陳詩韻一齊坐入董事局。而華置主席劉鳴煒同與細妹劉秀融同甘比一家關係亦唔差，逢親劉鳴煒宣傳旗下商場，甘比都捧場。依家大劉專心養病，甘比姊妹花就打理華置，好有分工合作feel。最重要係，呂麗君已辭任華置執董。你懂的。自從大劉劉鑾雄去年患病後，紅顏知己甘比一直貼身照顧，除咗陪伴大劉出入養和洗腎，有時更需要於醫院過夜。大劉脾氣係點唔使多講，有時病人心情難免欠佳，且大劉一向有潔癖，要照顧佢真係需要更多耐性。照顧大劉之餘，甘比仲耍睇住一對仔女，由日常起居生活、返學放學做功課，以及陪囡囡學跆拳道，甘比都係親力親為。今年8月，《蘋果》曾拍得甘比拖住囡囡去到銅鑼灣IKEA兒童部，買畫板、兒童用品及床單等等，似乎想培育女兒文武雙全。雖然有保鑣有工人，但甘比就得一個，分身不下，且大劉健康轉差，更加令佢擔心，所以呢幾個月以來見甘比明顯比之前憔悴，消瘦不少。日前甘比單拖出席一個慈善晚宴，心情似乎不錯，但就拒絕受訪。(新聞連結: http://bit.ly/2dEb55j )社交圈最近就流傳話，有啲富豪見到甘比為照顧大劉無微不至，都紛紛讚謂難得。而大劉亦對甘比疼愛有加，早前特地出院陪甘比返大宅慶祝37歲生日添！
來源 source: http://s.nextmedia.com
|
鍾意就快D Share啦！
|
|
|
