掃呢頁CODE去手機

2016年10月6日 星期四

7個月肚照落鋪 陳敏之佗 B運財 [壹週刊 - 1387] __,陳敏之,M1,

大住七個月肚,陳敏之照落鋪。娛樂偵訊7個月肚照落鋪 陳敏之佗B運財七月宣布佗B仔後,大肚陳敏之即變女王!37歲佗第一胎,老公、阿媽如臨大敵,出入陪到實;不過大肚婆唔悶得,加上餅店生意剛上軌道,怕悶的陳敏之照落鋪,有腹中運財B仔幫拖,密密吸客。戴口罩防菌陳敏之去年同拍拖十年圈外男友William結婚後,開始花更多時間轉型從商,由過去做網上生意,到正式有實體鋪開餅店。要開靚個頭,宣傳做足之外,又經常s ...


大住七個月肚,陳敏之照落鋪。

娛樂偵訊

7個月肚照落鋪 陳敏之佗 B運財

七月宣布佗 B仔後,大肚陳敏之即變女王! 37歲佗第一胎,老公、阿媽如臨大敵,出入陪到實;不過大肚婆唔悶得,加上餅店生意剛上軌道,怕悶的陳敏之照落鋪,有腹中運財 B仔幫拖,密密吸客。

戴口罩防菌

陳敏之去年同拍拖十年圈外男友 William結婚後,開始花更多時間轉型從商,由過去做網上生意,到正式有實體鋪開餅店。要開靚個頭,宣傳做足之外,又經常 share給其他藝人朋友,親自落鋪做生招牌,更加是指定動作。

就算粗身大細,陳敏之都冇鬆懈。早前,著住鬆身裙的她現身尖沙咀餅店,敏之媽亦傍實護駕。一到埗,事頭婆便捉住店鋪伙記討論產品擺位,又做埋 sales,細心向客人介紹產品,收錢、開單乜都落手。不過,鋪頭多人出入,為免惹到菌,敏之全程戴住口罩。

陳敏之挺住大肚做 sales,敏之媽亦幫手落嘴頭。

除咗 sell客,陳敏之連包裝、開單都跟到足。

一落到鋪頭,敏之就捉住伙記講講講。

過度活躍

佗 B七個月,陳敏之停工冇拍劇,見悶就會落鋪幫手,老公 William更專登安排出埠,等敏之產前保持愉快。

「敏之份人有啲過度活躍,有咗 BB之後都係咁上下!之前 William有幾日假,專登拉埋梁烈唯兩公婆一齊去旅行!平日敏之都會主動約我哋飲茶 shopping,佢話佗 B最緊要開心,想做乜就做,唔好俾自己壓力,不過 William都落咗 order,叫大家呢一、兩個月唔好再俾佢咁多約會,要敏之休息多啲!」知情人透露。

去旅行,大肚泳裝照當然要開心 share。

停工養胎,大得閒的敏之經常約老友 high tea吹水。

上月,活躍大肚婆去睇郭富城演唱會。

有着數

力不到不為財,藝人創業做生意,親自坐鎮做生招牌,係吸客最佳方法,明星效應,回本快,十分着數。

鄭欣宜

今年初,與朋友開「 Homie Cookies」賣曲奇,欣宜幾乎長駐鋪頭,加上圈中好友支持,曲奇每日沽清。

譚小環

14年,於銅鑼灣開第一間魚蛋檔「渣哥一九九六」,譚小環日日做魚蛋妹,開張一個月火速回本,今年五月,於尖東開分店,更被內地粉絲封為「魚丸西施」。

楊秀惠

與胞妹合資百萬於大坑開設日式刨冰店「越後屋」,楊秀惠經常落鋪坐鎮外,蔡思貝、翟威廉、胡定欣等亦先後現身試食造勢。

撰文、攝影、攝錄:娛樂組


鍾意就快D Share啦!