週日杏兒出發去巴黎時裝周， Philip做「跟得老公」同行。
娛樂偵訊
生 B計劃急凍 3個月 Philip氹杏兒咀完又咀
胡杏兒同老公李承德（ Philip）去年拉埋天窗，當時杏兒對住夫家鄉親父老開下三年抱兩的期票。眨吓眼就快一年，杏兒肚皮仲未有聲氣，但最近又被睇中拍住孫儷、陳曉，參與內地劇《那年花開月正圓》。唔想錯失良機，杏兒已同 Philip達成共識，將生 B大計順延三個月。
新劇十月中開工，週一（三日），杏兒出發去巴黎工作， Philip做「跟得老公」，兩公婆全程糖黐豆，眾目睽睽下嘴完又嘴， sweet到爆！
打情罵俏
同老婆向來恩愛的 Philip，日前與杏兒疑似在戲院炒完一鑊，之後仲嬲爆爆走埋！不過事後杏兒解釋，只是老公見她病，唔俾她食爆谷，並未有炒大鑊。
週日（十月二日）二人出席完楊怡羅仲謙婚禮後換過一身便服，便啟程去機場。
杏兒夫婦另加三名工作人員，一行五人排隊做登機手續，其間， Phillip突然肉緊地攬住老婆，再錫埋面珠。埋到櫃位，情深對望一輪， Philip又再情不自禁，攬住杏兒再錫一啖。
入到禁區，更加全程黐埋一嚿，二人面貼面卿卿我我，完全冇理會其他人眼望望。
機不可失
離開大台後，杏兒全力北上吸金，最近更有消息指她與孫儷、陳曉等國內一線電視劇卡士合作，她惟有將生 B計劃延期， Philip亦全面配合，支持另一半。
「原本杏兒 plan咗做完舞台劇，十月開始放假專心造人，點知可以拍住孫儷做女二，對杏兒喺內地發展一定有幫助， Philip話生 B幾時都可以，嚟緊杏兒要留响內地三個月，所以趁住要去巴黎做嘢， Philip跟埋去，兩公婆乘機拍吓拖。」胡杏兒身邊人說。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|