現年41歲的車婉婉今日宣布佗B，她接受《東網》訪問時透露現時懷孕4個月，預產期為明年4月，不過尚未確認BB性別，要待12月才會知道。婉婉又表示能夠懷孕要感謝上天，覺得是一個奇迹，因為她是個「烏龍媽媽」，竟然自己意外懷孕一個月也懵然不知。
食錯嘢身體虛弱入院
婉婉在電話中表示：「7月時，我無端端食錯嘢入咗醫院，我之前未試過入院，又屙又嘔、血壓又去到好低好低，好嚴重，醫生唔畀我出院。咁出咗院之後，覺得自己好似棵黃芽白咁好虛弱，嗰時所有嘅壞習慣都冇晒，飲酒飲咖啡都冇，我平時係一日飲三杯咖啡嘅人，但飲咗一啖覺得頂住個胃先至冇飲，嗰時覺得可能因為太虛有關，同埋以前我係一日食一餐或兩餐。」
瘦到得番100幾磅
婉婉透露試過去睇中醫，中醫叫她每日都要飲雞汁、燉生果以及燉羊湯補身，加上要戒咖啡及酒，身體才會開始覺得回復正常，但她仍然瘦到由110幾磅變成100幾磅，她又說：「嗰時咁虛弱，都唔諗住會有咗，又唔見佢（經期）嚟，認為同自己身虛有關，所以唔理啦。我啲血壓又係咁低，一直都冇理，但係好耐都冇嚟（經期），我有個好積極嘅朋友就問我係咪有咗呀，我話黐線，我答佢我就嚟弱到連自己都照顧唔到啦，仲話整多件。」
朋友幫買驗孕棒
其後婉婉的朋友為她送上驗孕棒，她說：「朋友幫我去買驗孕棒，佢買咗兩支驗孕棒，趁我同老公食飯嗰陣拎畀我。同我一齊食飯嘅老公，當然係唔知我哋做乜啦，當我返到屋企，我心諗搞錯，夾硬要人哋驗嘅，驗完又唔識睇喎，唔知一條線定兩條線，一條又有，一條又冇。（咁一條定兩條？）一條好深色，一條矇矇哋嘅，我咪唔知囉，我影幅相畀朋友，問朋友咁樣係點？朋友話『你有咗喎』，我話『唔係嘛』？朋友叫我試埋第二支，咁我邊有咁多尿屙呀，咁我惟有出去灌水飲囉，之後入去廁所再驗。呢次睇到有一條條嘢喺度眨吓眨吓，一路個心喺度噗噗咁跳，突然彈一個字出嚟『pregnant（懷孕的）』。」
老公嚇呆咗
婉婉指當時自己好茫然，不知如何是好，但她覺得應先告知老公，當時她老公正傾電話，她說：「我又唔知點樣講畀佢知，我話有嘢同佢講。佢收咗線後，我話我有啲嘢想問吓佢囉，如以前我哋會傾有小朋友會點樣，如果有BB會點樣，佢問我點解咁問，我有啲嘢要改變嘅，依家就好改變喇，之後啪一聲、啪咗條驗孕棒喺佢手上，老公立即呆咗，看見『pregnant』一字，老公立即上網查驗孕棒有幾準。」
老公唔想生女
婉婉又謂老公祈禱不要生女，但現時未知BB性別，她說；「12月先至知。（你鍾意男定女？）我冇乜所謂。（你老公係混血兒，BB一定好囉？）我都想呀，希望佢健健康康，都高齡產婦，一過40歲都覺得冇乜希望，跌咗落灰暗嘅幽谷咁樣。（諗過人工受孕？）Body Check時，有人介紹過，聽完之後覺得極度複雜，所以覺得係咪要去到嗰個地步，所以我哋好隨緣，唔係好劇烈咁想去生，如果劇烈就唔會計錯晒啲數啦。」
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
