掃呢頁CODE去手機

2016年10月30日 星期日

英超Fever:【英超有片】榜首三雄狂入波報捷 賴低曼聯 __,曼聯,

今個周六榜首3分齊發威,阿仙奴、曼城同利物浦全部贏波,3隊都轟入4球!上仗聯賽被米堡逼和嘅阿仙奴,作客包尾兼未贏過嘅新特蘭,因球證發雞盲冇畀12碼一度陷於苦戰,好彩有「銀河唯一」基奧特挺身而出,後備入替開齋省兩粒,最終以4比1擊敗「黑貓」,喺榜首三雄率先告捷。不過,曼城憑王牌阿古路梅開二度,打破佢1個月嘅入球荒,加埋根度簡都整番兩粒,作客以4比0擊敗西布朗,終結近6場正式比賽不勝困局,仲繼續食住兵 ...


今個周六榜首3分齊發威,阿仙奴、曼城同利物浦全部贏波,3隊都轟入4球!上仗聯賽被米堡逼和嘅阿仙奴,作客包尾兼未贏過嘅新特蘭,因球證發雞盲冇畀12碼一度陷於苦戰,好彩有「銀河唯一」基奧特挺身而出,後備入替開齋省兩粒,最終以4比1擊敗「黑貓」,喺榜首三雄率先告捷。

不過,曼城憑王牌阿古路梅開二度,打破佢1個月嘅入球荒,加埋根度簡都整番兩粒,作客以4比0擊敗西布朗,終結近6場正式比賽不勝困局,仲繼續食住兵工廠,搶番個「1哥」寶座。

利物浦最後出場,今場贏得勁辛苦,特別係後防不穩,上半場兩度畀對手追平,不過一對中堅洛夫雲同祖爾麥迪比各入1粒,總算將功補過,半場領先3:2。換邊後隊長軒達臣嚟個超靚助攻,羅拔圖法明奴處理得勁靚入波拉開比數,先淋熄水晶宮把火,全取勝利3分。今輪比賽完,紅軍、曼城、阿仙奴同得23分,未來仲有排鬥!

即睇基奧特兩球救廠:http://bit.ly/2dXDuTp 

即睇阿古獸發威整兩粒:http://bit.ly/2f0790d 

即睇根度簡入波:http://bit.ly/2dYcKCi 

【2:22】全場完,利物浦作客4:2砌低水晶宮!

【1:59】71分鐘,佐敦軒達臣超靚直線劏穿對手防線,法明奴入楔嚟個挑射入網,紅軍拉開比數4:2!

【1:48】水晶宮大舉進攻,洛夫雲於心臟地帶踢跌對手,主隊球員即時起哄話要判12碼,但球證冇畀。睇番慢鏡,犯規點喺禁區外。

【1:46】賓迪基幾乎搞掂!呢位倒戈鋒將禁區一抽,畀卡利奧斯救到,但呢位靚仔門將竟然甩手,紅軍球迷又要食救心!

【1:39】下半場開波冇耐,今場焦點之一嘅倒戈兵賓迪基差啲入波,利記門神卡利奧斯反應快,紅軍先唔使再輸多粒!

【1:19】如果你係利迷,依家應該神經衰弱或者心臟有啲痛,因為半場雙方互攻足足入咗5球!利記2度領先都畀主隊水晶宮追和,但係完半場前祖爾麥迪比個靚頭槌,幫紅軍第3度領先對手!利迷們,頂住呀,因為仲有45分鐘要捱...

【1:14】利記終於喺半場前第3度領先,古天奴開出右路角球,祖爾麥迪比用盡全身嘅力一頂破網,半場比數已經去到3:2喇!

【1:07】紅軍被追和之後積極進攻,古天奴同法明奴喺右路玩晒,後者地波畀沙治奧文尼,點知今季Fit到識飛嘅文尼,竟然喺無人看管嘅情況下射高!

【1:02】摩蘭奴射門中柱,水晶宮即時生猛晒,韋費特沙夏右路傳中,麥亞瑟飛將軍頂入,水晶宮再度追平!

【1:00】利記繼續攻,30分鐘古天奴牽引住水晶宮防將,令到摩蘭奴可以輕鬆喺禁區內攞波,但係佢唔傳中走去勁Bang,射門中柱彈出,嘥晒班入楔嘅隊友。

【00:52】呢頭想話洛夫雲衰仔,佢21分鐘就入番球將功補過,幫利物浦再度領先!

【00:48】利物浦作客水晶宮,只係開賽16分鐘,就有菲臘比古天奴畀個靚波落底線,艾拔圖摩蘭奴二傳畀安利簡恩射入,打開紀錄。點知唔夠兩分鐘,洛夫雲送大禮畀中場麥亞瑟,後者為主隊追和1:1。

【00:01】英超榜首三雄之二,阿仙奴同曼城都紛紛告捷,依家得番利物浦作客水晶宮未踢。水晶宮今仗派出賓迪基倒戈紅軍打正箭頭,誓要吐番口烏氣!利記近年作客水軍都麻麻地,今次又頂唔頂得住呢?唔好錯過呢場好波呀喂!完整陣容:http://bit.ly/2eYjvXs 

【23:53】西布朗對曼城最後以0:4完場,藍月亮大勝重回榜首,繼續以得失球壓住阿仙奴。至於曼城同市死敵曼聯,主場對般尼攻足全場,但係搵唔到入波,仲有寸王同安達靴里拉被逐,今次真係慘豬仔囉。

【23:47】唔止阿古路!曼城中場根度簡今場都好叻仔!呢位德國中場喺90分鐘,接應後備上陣嘅奇雲迪布尼傳中,毫無壓力下射成4:0,曼城9成9上番「1哥」位!

【23:38】個邊話曼城火力弱咗,阿古路即做嘢!呢位阿根廷國腳79分鐘禁區頂,撩個直線畀空晒冇越位嘅根度簡,根仔冇令阿古路投桃報李失敗,輕鬆射入第3球!

【23:24】曼城下半場火力減弱,西布朗即刻壓前,雖然多次埋門不果,但係愈踢愈似樣,有可能追番一球!至於另邊廂嘅曼聯主場對般尼,雖然形勢都幾一面倒,但係寸王莫連奴反對球證唔判12碼太激進,畀球證罰上看台睇波,68分鐘仲有安達靴里拉畀球證趕埋出場,今次大鑊了!

【23:12】西布朗對曼城下半場開賽10分鐘,主隊捱過藍月亮一段攻勢之後,差啲就追番一粒。前鋒朗多接受隊友長傳,禁區頂頭槌笠過出迎嘅曼城膠爆門神哥迪奧巴禾,可惜係個波唔中目標。

【22:48】曼城半場領先西布朗兩粒,射手阿古路復任正選即時有料到,兩個入波都盡題功架。哥帥好心唔好再玩嘢喇,出阿古路咪好地地囉。

【22:28】阿古獸發狂呀!阿古路28分鐘喺禁區頂,畀4名西布朗球員包圍之下,射咗球世界波,賓科士打飛到盡都掂唔到波邊。曼城唔使半個鐘就領先到2:0喇!

【22:26】26分鐘又係根度簡呀,今次又係佢交個靚波畀空晒嘅洛尼圖,但係狂牛射手省中護空龍嘅西軍球員。

【22:19】曼城19分鐘先開紀錄!藍月亮中場根度簡交個靚波畀阿古路,後者輕鬆入到禁區射遠柱得手!

【22:17】17分鐘,曼聯伊巴接應桑馬達靚爆直線,但係單刀又射唔入。

【22:08】曼聯主場對西布朗,領隊莫連奴冇好似傳聞中咁放棄伊巴謙莫域,呢位近期陷入入球荒嘅射手,而呢位瑞典神鋒喺8分鐘亦有第1腳射門,連框都唔中,入波繼續等。

【22:04】開波只係4分鐘,曼城已經搶攻,史達寧右路一對二照搵到位起腳,可惜角度唔夠刁鑽,難唔到西布朗門神賓科士打。

【21:30】曼城連續6場不勝之後,10點作客西布朗場波,領隊哥迪奧拿終於唔敢玩嘢,出番阿古路呢位射手。藍月亮頹咗咁耐,唔知阿古路正選會唔會幫到球隊重返勝軌呢?完整陣容:http://bit.ly/2e86cnR 

【21:23】全場完!阿仙奴雖然曾經一度被追和,但係好在基奧特入嚟做到嘢,上住榜首先!

【21:07】基奧特入完第1球先5分鐘,就再整多粒!奧斯爾右路開出角球,銀河唯一揳近柱一批笠死新特門將,梅昇二度。阿仙奴攞住兩球優勢打得更放,1分鐘後A山門前執雞入多球,阿仙奴遙遙領先4:1。

【21:01】雲格換入基奧特,代替冇腳好波嘅伊禾比,即時見效!71分鐘,兵工廠左閘基蘭傑比斯出半腰波,基奧特喺對手力壓下,依然整個靚窩利,比數改寫成2:1,槍手再度領先。

【20:52】A山喺62分鐘推入禁區,被新特蘭後防拉跌,但係球證唔畀12碼。唔夠2分鐘,呢邊廂鄧肯禾特摩亞單刀入禁區,畀施治拉跌。迪科爾呢位老牌射手操刀一射破網,黑貓多得球證唔畀A山個12碼,成功追和1:1!

【20:48】槍手乘新特蘭壓前搶攻,打番個反擊,張伯倫自己一個帶咗一程殺入禁區,可惜食唔正個波,未能為阿記爭到第2個入球。

【20:46】黑貓下半場終於叫似番啲樣,迪科爾禁區頂送屈摩亞一程,後者撳入中路,可惜畀阿仙奴守將截到,但係新特蘭換邊後明顯入咗局。

【20:19】半場完,阿仙奴佔優勢,踢得都幾輕鬆,憑住19分鐘阿歷斯山齊士嘅入球,半場領先新特蘭1:0。黑貓唔係冇攻勢,但係入肉嘅一啲都唔多,仲要食咗球詐胡,莫耶斯想開齋,真係要返入更衣室度一度條絕橋先得喇。

【19:51】阿仙奴19分鐘打破缺口,Alex張伯倫右路出個靚波畀Alexis山齊士,細細粒嘅後者揳個靚位銅頭一搖,黑貓門將比克福特反應都冇,槍手領先1:0。

【19:47】比賽進行咗15分鐘左右,阿仙奴表現確係佔上風,短傳入楔令到黑貓頭痛,而最佳機會應該係防中高基連突然殺上去,接應隊友妙傳造出單刀機會。可惜呢位防中唔識處理,太早Cut入中路,畀對手截劫,連腳都起唔到。

【19:22】新特蘭對阿仙奴有陣喇!兵工廠領隊雲格今場,畀周中聯賽盃表現出色嘅阿歷士張伯倫打正選,代替禾確特,完整陣容可以去呢度睇:http://bit.ly/2dQKsi2 

SO東波同你追實體壇每個精彩時刻! 

http://on.fb.me/1PWMCFH 

想撐本地波?即Like我撐本地波Facebook專頁

http://bit.ly/1Wm3E4Q 


來源 source: http://hk.on.cc
鍾意就快D Share啦!