網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2016年11月17日 星期四

遇電話騙案 呃錢變被溝 江欣燕:佢真係發瘟 [壹週刊 - 1393] __,江欣燕,M1,

娛樂偵訊遇電話騙案 呃錢變被溝 江欣燕:佢真係發瘟雖然政府廣告經常向市民呼籲:「不明來電要核實,勿做騙徒提款機。」但反應快的江欣燕,跟前保安局局長葉劉一樣,都上當。「入境處」及「公安局」上週聯絡江欣燕,信以為真的她中招後去報案,但好戲在後頭!厚顏騙徒呃唔到錢,索性轉溝江欣燕,死𦧲求做friend,匪夷所思。做開搞笑節目,江欣燕遇騙案都變成鬧劇。唔怕俾人笑豬頭我肯詳細講,俾人話我係豬頭都唔緊要,因為 ...


娛樂偵訊

遇電話騙案 呃錢變被溝 江欣燕:佢真係發瘟

雖然政府廣告經常向市民呼籲:「不明來電要核實,勿做騙徒提款機。」但反應快的江欣燕,跟前保安局局長葉劉一樣,都上當。

「入境處」及「公安局」上週聯絡江欣燕,信以為真的她中招後去報案,但好戲在後頭!厚顏騙徒呃唔到錢,索性轉溝江欣燕,死𦧲求做 friend,匪夷所思。

做開搞笑節目,江欣燕遇騙案都變成鬧劇。

唔怕俾人笑豬頭

我肯詳細講,俾人話我係豬頭都唔緊要,因為唔想再有受害者。

騙徒手法層出不窮,精靈的江欣燕都上當,有傳她上週三中招後,即往西環警署報警。本刊向她求證遇騙一事,江欣燕猶豫幾秒後承認:「公開只係唔想再有其他人受害。」

上週三中午,在廚房煮飯煮到一頭煙的江欣燕,從母親手上接過手機,但沒為意來電號碼。

「有個講廣東話嘅女人自稱係入境處,又話寄咗信俾我又冇回音,問我有冇收到。我一聽到好緊張,佢跟住話想同我證實,上個月(十月十日)有冇喺內地為一個叫林燕女子申請中港通行證。」

盜取身份證回鄉咭資料

劇情發展下去,是江欣燕資料被盜用,騙徒以核實身份為由,叫她報上全名和身份證號碼。聽到「資料被盜用」五個字,江欣燕已陣腳大亂,信以為真。

「佢話將電話駁去內地入境處處理,之後有個講普通話,自稱姓顧嘅內地入境處職員問埋我回鄉咭號碼,話事態嚴重,為免賊人會攞晒我啲資料去犯案,必需要我兩點前打去上海公安局報案。仲叫我用筆寫低重點同我嘅檔案編號。唉,我又真係寫低!」講到呢度,江欣燕都忍唔住笑自己低 B。

起初信以為真的她,收線後跟指示 send了相給對方,令騙徒得悉獵物是藝人。

騙徒「林警官」跟江欣燕收線後,再 WhatsApp提她記得上其「官方」網頁核實他是公安身份。戲,做到足!

愈諗愈嬲的江欣燕,上週去咗西環警署報案。

見江欣燕冇反應,睇中她美色的騙徒日日電話強攻。

電話騙徒已經發展到知你報咗警,都唔驚。

醒爆江母猛叫收線

最弊連七十幾歲的江母,都醒過江欣燕。

「我話唔識打去上海報案,對方就話幫我請示上司,幫我將電話直接轉駁到上海。事後諗番,佢唔俾我收線,因為佢聽到我阿媽喺身邊不斷話我俾人呃,我竟然迷咗落去,仲叫阿媽唔好嘈。」江欣燕真係好迷。

江父早前病逝,心情未平復的江欣燕一個不留神被騙。

膽大的騙徒仲八卦她與前夫的事,離晒譜。

警方不受理

49歲 keep得好的江欣燕,追求者之一竟然係電話騙徒。

下一幕,是有個自稱公安的男人出現。騙徒「林警官」不停以核實其公安機構為由,叫江欣燕上一個網頁;但屋企冇電腦,騙徒於是叫江欣燕用手機上網,因為愈搞愈複雜,嫌麻煩的江欣燕索性話唔識搞,才不致被對方盜取更多資料。事後,江欣燕打去對方留下所謂的入境處電話,發現冇登記,先知中招。

愈諗愈嬲的江欣燕,當日立即去報警。

「警察冇笑我!但因為冇財物損失,年中又過萬宗類似個案,假電話無法追索,所以警方不受理。」警員給她一份防電話騙案冊子,就打發她走。

現實騙案,落在江欣燕身上變成鬧劇。

騙徒死纏做 friend

以為報咗警就告一段落!點知好戲在後頭。

「林警官」繼續 WhatsApp江欣燕,保持「聯絡」,就算之後江欣燕聲稱已報警,叫對方回頭是岸,厚顏無恥的騙徒仲好淡定,同江欣燕玩「最緊要正字」,糾正她的錯別字;呃唔到錢,騙徒竟轉軚狂追,留言:「我們交個朋友。」、「你真的好漂亮。」、「你要知道,我們這個圈子的人也有好人。」

見江欣燕冇搭訕,騙徒日日電話攻勢,搞到江欣燕要 block咗對方,才告一段落。

被無恥騙徒狂追,江欣燕哭笑不得。

「佢真係發瘟!可能佢覺得我相貌娟好啩?但真係好離譜。騙徒要呃你,手法真係日日唔同,我勸用網上銀行、 Paypal嘅人要小心,好在我好少網上交易,最多買下 game啫。」江欣燕說。

江欣燕呢鋪電話騙案,好笑過佢演出嘅《為食神探》。

「獎老」曾志偉真係要醒江欣燕幾招防騙錦囊。

七十歲的江母醒過江欣燕,知道係騙徒,猛叫佢收線。

電話騙案未停過

騙徒手法層出不窮,特別係電話騙案,扮公安、扮速遞,醒到連前保安局局長葉劉淑儀都中招。

劉嘉玲

15年 9月,劉嘉玲接到自稱「順豐速遞」職員的電話,指她在上海寄去嘉定的郵件中藏有非法護照,最後因自己沒有託順豐送貨,加上對方提及的地址亦有出入,知遇上電話騙案,即刻收線。

葉劉淑儀

15年 2月,網絡黑客向本港政商名人發詐騙電郵,前保安局局長、行政會議成員葉劉淑儀不慎中招,打開港鐵主席錢果豐給她的電郵時被黑客入侵其電郵賬戶,將其戶口中的六萬五千美元(約五十萬港元)轉去新加坡一個神秘戶口。

陳國邦

14年 1月,羅敏莊指老公陳國邦接到電話,訛稱有朋友要錢急用,差啲被騙 6萬元人民幣,幸好找到好友熊欣欣,避過一劫。

撰文、攝影、攝錄:娛樂組


鍾意就快D Share啦!