掃呢頁CODE去手機

2016年11月25日 星期五

點解咁得意? 漁農選委集體「轉工」 [壹週刊 - 1394] __,M1,

眾人諸事點解咁得意? 漁農選委集體「轉工」主宰下屆特首係邊個嘅一千二百人「小圈子」選委會提名期結束,三十八個界別中,十三個因候選人少於獲分配議席,毋須選舉就自動當選。議席大戶漁農界,又係圍威喂,自己斟掂數,60個位,60人參選,唔使爭,全數自動當選。農業及漁業佔本港勞動人口不足百分之一,漁農界不成比例擁有百分之五議席,過去已為人詬病,上屆仲有唔少選委被指同漁農業扯唔上關係;不過,今屆佢哋似乎做番啲 ...


眾人諸事

點解咁得意? 漁農選委集體「轉工」

主宰下屆特首係邊個嘅一千二百人「小圈子」選委會提名期結束,三十八個界別中,十三個因候選人少於獲分配議席,毋須選舉就自動當選。議席大戶漁農界,又係圍威喂,自己斟掂數, 60個位, 60人參選,唔使爭,全數自動當選。

農業及漁業佔本港勞動人口不足百分之一,漁農界不成比例擁有百分之五議席,過去已為人詬病,上屆仲有唔少選委被指同漁農業扯唔上關係;不過,今屆佢哋似乎做番啲嘢,其中 56人申報從事同漁農業相關工作。

《壹》仔比較上屆選委同今次嘅提名名單,發現佢哋唔少人竟然响今年集體「轉工」;例如上屆報稱水務署技工嘅張火有,今年就變咗做「漁業」;上屆報稱「文員」嘅楊上進,就變成「漁民」……個個都忽然「轉工」,唔通咁樣就可以塞住大家把口?

更加奇怪嘅係,有啲選委,明明上屆報稱係民建聯成員,但今年報名時竟然去政黨化「隱藏身份」,乜俾人知道你係民建聯身份係負資產,好失禮咩?

呢位楊上進先生喺參選選委方面真係好「上進」,上屆做完文員(左圖),今屆返璞歸真,報名時話自己係漁民。

又係土地問題 第一城鎖車收入年搵百萬

沙田第一城管理員非常盡責,一見有違例泊車就即刻鎖車,幫一眾業主賺咗唔少錢補貼維修費。

香港唔少屋苑近年都要做維修,屋苑盤數成日都有出冇入,搞到業主好頭痕,但原來香港有啲屋苑好識搵錢,每年輕輕鬆鬆都可以搵到過百萬收入。

有住喺第一城嘅老友,近日將屋苑「公眾收入與支出」賬目條數俾咗《壹》仔睇,今年頭九個月,原來第一城單係鎖車,已經進賬咗超過七十八萬元,預計今年埋單,收入應該會有一百一十五萬元,唔單止成為屋苑最大筆單一收入,更佔總收入近三成。

點解鎖車可以鎖到咁富貴?咪又係土地問題囉,因為沙田第一城屋苑裡面大部分都屬於私家路,管理公司派人周圍巡,只要見到有車違泊,就會九秒九上鎖。車主要開鎖,就要乖乖奉上三百二十元,加上屋苑負責鎖車嘅管理員有得分賬,鎖車當然更加落力。

慎防臨埋門被 DQ 泛民諗定 Plan B

青年新政梁頌恆、游蕙禎被判喪失議席後,唔少人都開始考慮參加新東同九西補選。建制派當然對席位虎視眈眈,泛民唔同黨派就十五十六,皆因政治倫理嚟講,應該優先俾本土派出嚟選,但又擔心政府又玩嘢,喺提名期過後先 DQ本土派候選人,即係益咗建制派,所以要諗定 Plan B,唔好俾建制派得逞。

雖則新民主同盟范國威講明會考慮參選新東,不過似乎民主黨唔特別支持佢,始終雙方牙齒印太多,況且如果民主黨派人參選,票數亦未必少過范國威。至於九西選區,有傳民協馮檢基想返去老巢出選,不過黨內就有反對聲音,覺得既然世代更替,點解唔係由今年出戰超區嘅何啟明去選?政圈亦有傳公民黨陳家洛有意選九西,不過佢回應話大家諗得太多,佢話冇打算參加補選喎。

泛民唔同黨派都蠢蠢欲動,負責泛民選舉協調嘅民主動力召集人趙家賢話,如果各黨派同意初選,民主動力願意負責初選操作,但講明各黨派要平均夾錢。但有泛民中人直言,錢唔係最大問題,而係如果個個候選人都覺得自己有勝算,就唔會想搞初選。

政圈有傳陳家洛出山參加補選,但佢話可能係大家太掛住佢,先會 FF太多。

民協今屆冇晒議席,馮檢基似乎不甘寂寞,又再想參加補選,仲上載埋擺街站圖片上 Facebook。

黃之鋒勾結美國勢力靠 Say Hi

香港眾志秘書長黃之鋒上星期六完咗訪美行程,佢接受《壹》仔專訪,呢期香港政治低氣壓,中港政權將分裂國家視為死罪,之鋒公然「勾結美國勢力」,左報點會放過佢,果然立即中箭,星期一嘅《文匯報》,已經有來論指佢做漢奸,又老調重提「美國國家民主基金會」向佢承諾幫佢安排好「後路」。

講到之鋒咁把炮,實情又係點?雖然之鋒今次喺美國,先後見咗好關心香港事務嘅眾議員少數派領袖、民主黨嘅佩洛西( Nancy Pelosi),以及美國國會及行政當局中國委員會( CECC)聯合主席、共和黨總統參議員魯比奧( Marco Rubio),不過,原來其實係之鋒之前主動電郵佢哋求見嘅。

之鋒自爆,佢喺電郵度劈頭就話:「 Hi, I am Joshua Wong!」但人哋真係識佢條鐵咩,不過多得佢曾被選為「全球百大思想家」,又上過《時代》雜誌封面,叫做有啲名聲,結果先換嚟見面機會,「呢啲光環係用嚟燒嘅,呢啲銜頭,以前自己聽到都想嘔,估唔到家吓有用。」睇番資料, 689上年都一樣見過佩洛西,仲同人哋閉門會議,咁係咪更罪加一等呢?

之鋒靠 send email都可以獲美國眾議員、參議員會面,全靠過去有社運光環咋!

之鋒「勾結」美國勢力,同佩洛西握晒手,唔使問左報又有「新聞」可以大寫特寫,工聯會王國興仲鬧佢係賣國賊添。

撰文:巫不言

news@nextdigital.com.hk


鍾意就快D Share啦!