探熱針
結婚同佗 B一樣 雞年新娘孫慧雪：呢啲嘢好小氣
宅男女神孫慧雪跟闊少 Edwin Lo拍拖四年，七月宣布分手又火速復合，近日更屢傳婚訊，數日前再有報導指二人在愉景灣行婚禮，當日要開工的阿雪即時否認。據知，現年 34歲的雪雪 BB的確好事近，正計劃跟男友拉埋天窗做雞年新娘，對於明年做人妻，她說：「呢啲嘢好小氣，唔想講太多。」收到，明白晒！
接男友放工
上週一（十月二十四日）晚，新劇《幕後玩家》首播，劇中一班演員在西貢邊擦海鮮邊睇劇。在外地開工的黃宗澤及黃翠如缺席外，蕭正楠、張繼聰、劉佩玥、龔嘉欣以及在劇中負責晒 33C的孫慧雪等都有出席。
八點人齊開飯，食到十點左右陸續散，跟老婆謝安琪前後腳到酒樓的張繼聰離開時全程護住大肚老婆，細心的他更預早安排司機在門口等候，扶老婆上車後，他才跟大隊講拜拜離去。
至於另一女神雪雪 BB先坐宋熙年順風車到南圍，然後再坐陳華鑫的 Mini Cooper過海，在銅鑼灣落車後，又孖住同行曾敏坐的士到北角。
好掛住你
原來當晚雪雪 BB接男友收工，在門口等了二十分鐘， Edwin終於出現，見男友攞住一大桶蒸餾水，雪雪 BB不單沒有表現不耐煩，還向男友撒嬌：「我好掛住你。」之後二人雙雙返回嘉亨灣愛巢。
為慶祝入行十年，七月出完處女寫真集後，一度人氣急升的雪雪 BB隨即變宅男女神，為配合宣傳，她表示甩拖半年 dry爆。
「其實當時佢同 Edwin係有少少問題，不過好快無事，之後俾人影到佢哋兩個行街拍拖，阿雪都即刻坦白話同 Edwin好番，佢一直都好緊張 Edwin，因為呢個男仔好好，做嘢叻又錫自己，係結婚對象。」知情者說。
打本做生意
有個女神女友， Edwin對雪雪 BB亦十分支持，數年前，他便打本給女友做生意。
「有段時間，阿雪想學做生意， Edwin就俾錢佢搞時裝店，不過阿雪劇接劇，根本冇時間，最後都搞唔成。出咗寫真集後，仲愈來愈多嘢做， Edwin都係工作狂，大家見面時間唔算多。」知情者說。
三十有四，加上遇到 Mr.Right，雪雪 BB亦不敢怠慢，向閨密透露決定明年結婚，二人早前更被拍到孖住買戒指及床上用品。有指她明年嫁有米闊少。雪雪 BB曲線回答：「呢啲嘢好小氣，唔想講得太多，我哋都有咁嘅方向，不過近排大家工作好忙，未有時間。而家兩個人感情好好，如果結婚，我一定會同大家講嘅。（有冇諗過即刻生 B？）呢個太遠嘞，未諗到。」
同場加演：謝安琪大肚出巡
撰文、攝影、攝錄：娛樂組
|
鍾意就快D Share啦！
|
|
|
