退隱娛樂圈11年嘅鍾淑慧，近日因為老公吳岱融人氣升而帶挈復出，獲馬來西亞一個護膚品牌邀請做代言。噚日鍾淑慧接受《蘋果》訪問，就話日前去咗馬來西亞拍呢個廣告，導演仲想叫佢「凍齡女神」，不過佢就話自己唔係「凍齡女神」，所以最後同導演傾，要改對白。不過當年由電視框跳出大銀幕嘅鍾淑慧，到今時今日因為老公嘅人氣再同大家見面，都仲保持得咁好，其實話佢係「凍齡女神」都不為過。當時鍾淑慧去咗拍三級片，同老公吳岱融合作咗拍幾部三級片，惹嚟當時唔少迴響。直到95年佢哋兩個結婚，之後又返咗去大陸發展，好少喺香港再見到佢嘅踪影。不過世事冇絕對，最近因為老公吳岱融喺《巨輪2》演得好獸性，激發一班網民喪煲佢同老婆拍過嘅三級片，有網民仲大讚鍾淑慧當年喺《弱殺》入面，扮演智障人士嘅表現夠出色。有人讚當然開心，不過亦有好多人仍然戴住有色眼鏡去睇三級女星，所以有唔少曾經拍過三級片嘅女星覺得好後悔，甚至唔多想講自己曾經有過呢種經歷，鍾淑慧噚日接受《蘋果》訪問，亦都有提到呢樣嘢，唔知佢又有冇後悔過呢？佢話：「其實又冇囉，當年我都有份參與呢個劇本，有共識點樣去拍，而且我哋嗰幾部戲嘅題材都係真人真事，當然要加入啲電影元素，真係唔少得。」鍾淑慧仲話：「作為一個演員，我覺得又唔係賣弄，而且喺嗰個時間，對我哋嚟講，又係一個好大嘅挑戰，變咗覺得唔係乜嘢嘅一回事，事實上喺外國嚟講，某啲位都係合情合理，都係好正常，我自己係喺絕對接受嘅情況下接拍，所以唔可以話有乜嘢後悔唔後悔，呢啲嘢係自己去決定，對演員嚟講係一個經歷。」
|
鍾意就快D Share啦！
|
|
|