無綫小花李佳芯早前已憑「最強小三」成功彈起，最近主演嘅電視劇《巨輪II》及《律政強人》反應都唔錯，靠奸上位嘅佢演技獲激讚！Ali憑着努力終於由小花成功攀上花旦之位，劇接劇嘅佢，睇嚟大有機會威脅同樣從有線過檔嘅「宿敵」黃翠如！
獨自搬篋
上緊位嘅Ali為免戀情阻礙事業發展，未紅之時佢毫無顧忌同ViuTV主持男友陳炳銓（Danny）同居於西貢村屋，最近態度卻180度大轉變，Ali先搬返柴灣屋邨老家避嫌，繼而「出口術」自認單身冇男友，不過紙始終包唔住火，更何況係戀火呢！宣稱冇男友後，Ali頻頻獨來獨往，日日返柴灣老家，日前工作後嬌滴滴嘅佢獨自將大大個篋搬上搬落，孭住個大袋再推行李返屋企！
陪揀性感背心
相隔幾日，Ali終於忍唔住同男友「偷會」，當日下午5點幾，Ali於電視城開完工，戴上cap帽及粗框眼鏡遮樣便匆匆揸車到附近商場，只見佢入到商場即小心周圍望，似係視察有冇被追蹤，繼而心不在焉地行逛幾間舖，確保安全後，男友陳炳銓終於現身，只見佢低調地步入時裝店會合女友，陪Ali揀咗幾件性感吊帶背心，有見店舖人頭湧湧，兩人一直刻意保持距離。
肩並肩唔敢拖手
買完靚衫，Ali同男友就扮唔太相熟，離行離列地行去樓上嘅日本餐廳，享受片刻二人世界，兩人挑選最隱蔽嘅位置坐低，一餐飯食足約3粒鐘，盡訴幾日以來嘅別離之情後，一對戀人終於肩並肩步出，有見商場人流較少，Ali同男友情不自禁地愈行愈埋，更見肩碰肩，親密關係不言而喻，但兩人始終唔敢拖手仔！
唔捨得「分手」
及至行到停車場攞車，離別在即兩人企喺座駕前把握時間傾多陣，然後先依依不捨地各自上車，前車貼後車，浪漫地揸車拍拖，直至離開將軍澳才正式分道揚鑣，Ali為保事業發展，惟有孤獨地駕車返回柴灣老家，泊好車後孤身上樓。
陳炳銓起底
究竟點樣可以俘虜佳芯BB，陳炳銓來頭絕對唔少嘢！佢喺加拿大Grant MacEwan College修讀舞台製作，2002年畢業後回港任小朋友戲劇班導師。之後喺Now TV主持《撳錢》、《山步．行》等節目。2014年仲自編自導自演舞台劇《玩死卓別靈2》，與藝人董敏莉合作！
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|