藝人陳豪和「香港小巨肺」譚芷昀（Celine）在九龍塘出席「又一城‧喬漢娜的聖誕秘密花園」開幕禮暨聖誕樹亮燈儀式。身穿紅色西裝、被《東網》獨家拍得和老婆陳茵媺漏夜入院的陳豪，現身時笑容沒有平時般開朗，感覺有點心事。陳豪在台上指自己最近與家中的小朋友裝飾聖誕樹，又指現場的全港室內最高、達七十呎的聖誕樹「好靚」、「好Warm」。他又指自己小時候家中都有棵巨型聖誕樹：「Boxing Day會喺樹下拆禮物，好深印象！」至於Celine就即場獻唱，令觀眾聽出耳油。
「對眼紅得好過份」
訪問時，問到老婆是否第四度大肚時，陳豪即時笑謂：「哈哈，唔係！如果有咗又點會入急症呢！？因為太太不嬲都有鼻敏感，嗰晚鼻敏感好犀利，同埋湊小朋友唔夠瞓，對眼紅得好過份。本身太太都話朝早先去睇眼科，我就話唔好，就好緊張咁話同佢睇急症，Check有冇咩問題先。睇完醫生之後，醫生都話冇乜事，開咗啲藥，食咗之後太太都好番好多。」
再問陳茵媺須否覆診，他表示太太狀況比之前好得多，所以沒有需要再睇醫生：「不過你哋都啱，遲啲都應該去眼科檢查吓。（紅得好勁？）真係好紅，好擔心，檢查咗會安心啲！」
教小朋友唔好浪費
談到聖誕節臨近，問會否一家人出埠玩，陳豪即謂：「唔會，會同啲小朋友喺香港周圍玩，去商場睇聖誕樹，去維園玩吓，參加吓聖誕Party。（買禮物畀小朋友？）屋企已經有好多佢哋嘅禮物，有啲朋友送、有啲屋企人買，我啲小朋友太多玩具，都要教佢哋唔好浪費。（要換間大啲嘅屋？）夠大喇，唔使再換，喺屋企已經行餐飽！」
情慾戲留番畀三哥
最近忙拍無綫新劇《使徒行者2》的陳豪要中港兩邊走，問是否多動作場面，他謂：「我做大佬唔使打，我係點人哋去打，講一句『去吧』，佢哋就會打。（有親熱戲？）我自己就冇嘅，感情線就同宣萱，其實都唔係太多感情線，情慾戲唔使我嚟啦。（留番畀三哥苗僑偉？）Yeah！」問已三度當爸的陳豪會否再生多個，他笑謂：「唔喇唔喇，夠喇，已經忙到不得了，都已經好滿足，有晒所有嘢，好感謝上天！」
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
