掃呢頁CODE去手機

2016年11月10日 星期四

拖男友遊海洋公園  JW高調封卓悅太子盤 [壹週刊 - 1392] __,卓悅,JW,M1,

身為市值12億卓悅太子爺,Tarzan唔介意陪女友JW坐地下。娛樂偵訊拖男友遊海洋公園 JW高調封卓悅太子盤JW(王灝兒)同卓悅太子爺TarzanIp戀情曝光後,前男友Mark即在網上贈興,指她為錢移情兼唔介意「美女與野獸」。對前度的指控,JW當冇事發生,繼續同現任糖黐豆,十指緊扣遊海洋公園,Tarzan更忍唔住,當眾一啖錫落女友面珠。冇親口認愛,只付諸行動的JW,三兩下手勢便將卓悅太子男友私有化 ...


身為市值 12億卓悅太子爺, Tarzan唔介意陪女友 JW坐地下。

娛樂偵訊

拖男友遊海洋公園  JW高調封卓悅太子盤

JW(王灝兒)同卓悅太子爺 Tarzan Ip戀情曝光後,前男友 Mark即在網上贈興,指她為錢移情兼唔介意「美女與野獸」。對前度的指控, JW當冇事發生,繼續同現任糖黐豆,十指緊扣遊海洋公園, Tarzan更忍唔住,當眾一啖錫落女友面珠。

冇親口認愛,只付諸行動的 JW,三兩下手勢便將卓悅太子男友私有化,公告其他野花,咪亂嚟!

決意斬纜

早前 Tarzan帶埋女友參與朋友搞的 Halloween party,打扮成比卡超的 JW非常投入。

入行六年,只有二十六歲的 JW去年被爆有個拍拖兩年、外公是關之琳前夫王國旌的男友 Mark Ngai,雖然 JW未有公開承認戀情,不過二人於朋友圈中是公認一對,但 Mark喜愛夜浦溝女, JW忍無可忍,決意斬纜。

「 Mark同 JW久不久就會嗌分手,不過 Mark口甜舌滑,次次都氹得番女友。 Mark都以為自己食硬對方,直到早排 JW開騷, Mark先開始 feel到女友對自己有啲唔妥,好冷淡之餘,仲係咁提出分手。到 JW同 Tarzan拍拖報導出街, Mark先知原來女友已經移情別戀!」知情人士透露。

又拖又錫

同市值十二億卓悅闊少 Tarzan戀情曝光後,事業愛情兩得意的 JW未有親口認愛,但就毫不避忌,經常被發現同男方蜜會。

本刊早前就遇上二人去海洋公園參加哈佬喂狂歡。戴住 cap帽的 JW,毫無戒心地同男友喪玩,排隊玩鬼屋,二人全程十指緊扣;落電梯時間,生得細細粒的 JW如小鳥依人咁挨住男友,只見 Tarzan攬實女友纖腰外,又肉緊地一啖錫落 JW面珠。拍拖甜蜜蜜,坐地下睇巡演,陶醉於二人世界的 JW,與 Tarzan玩到散場才齊齊返歸。

Tarzan對住小鳥依人般的 JW,情不自禁錫啖。

拎住男友玩遊戲贏得的毛公仔, JW十足大細路。

JW放下戒心同男友手拖手遊海洋公園,其間二人似有傾唔完的話題。

Tarzan攬實 JW排隊玩鬼屋。

散場後,二人齊齊返歸。

做跟得女友

出席活動被問起與 Tarzan戀情時, JW總是嘴角含春,對於男友被指是𡃁模殺手, JW投下百分百信任票。

「其實 Tarzan喺英國讀書返嚟之後,成日同班富二代朋友出去蒲,朋友介紹咗好多𡃁模俾佢識,好似媽模陳靜儀( Mia)、「藍莓」劉俐、唐貝詩都同佢好 close過;不過 Tarzan知有啲女仔都係睇錢,所以要佢投入真感情,真係唔容易!

「佢同 JW都係經朋友介紹識,原本 Tarzan對呢段關係都有保留,但見 JW成日做跟得女友,出街拍拖又唔使偷偷摸摸咁, Tarzan個心先定晒!依家 Tarzan對啲所謂 model朋友都會避忌啲, JW呢啲咪高招囉!擺明車馬封你盤,不過佢自己都係好認真,又唔見佢以前同 Mark咁公開?」 Tarzan身邊好友說。

上週五(十一月四日),出席完活動的 JW即趕去中環會合男友拍拖。

JW經常以「女主人」身份到馬場撐男友愛駒。

經常孖公仔的 Tarzan和 JW,同女友人齊齊拆蟹。

今年初, JW與 Mark孖住同 G.E.M.等朋友行山。

同舊愛 Mark拍拖兩年多, JW亦曾見埋對方家長。

錢作怪

「上進」心,人人皆有!男人想娶有錢女,女人想嫁入豪門,為自己「錢」途着想的圈中男女,狠撇窮舊愛,大把!

蕭正楠

14年,撇甩舊愛何傲芝搭上黃翠如,其後爆出女方禾稈冚珍珠,其父親黃永華是上市公司主席,身家以億計,蕭正楠立即升呢,進身「億元駙馬」。

楊思琦

11年,被爆背住拍拖九年男友李泳豪劈腿,偷食有米吳帥,其後始發現對方是空心老倌,楊思琦即跳船,寧願做單親媽咪自保。

樂瞳

無仔不歡的樂瞳,入行五年收兵無數,早前狠撇六呎金融型男,搭上出入揸百萬瑪莎拉蒂,家住九龍站 The Austin的富二代 David,二人打得火熱,一個多月先後同遊台灣、澳洲,食好住好,可惜關係建立在金錢上,玩唔長。

撰文、攝影、攝錄:娛樂組


鍾意就快D Share啦!