樂隊RubberBand加入樂壇9年，隊長兼結他手阿正（馮庭正）甚少談及私生活，阿正2015年於瑞士雪山向拍拖3年的「馬來西亞小姐」黃淑玲（Sherine）求婚，今年初再於半島酒店舉行婚宴正式拉埋天窗。由求婚到婚禮阿正均「落重本」既花心思又肯揼錢，錫老婆錫到燶的他最近更斥巨資，為向來愛唱歌、歌喉靚絶的老婆出碟圓歌手夢，推出靚聲HiFi碟。不少人均好奇，同樣為本土樂隊的Mr.早前內訌，被揭除了富貴主音Alan不愁生活，其他人均要搵「副業」搵銀，相比之下為何阿正能夠有如此財力？！
親自為老婆作曲做監製
原來一直低調的阿正，從沒有透露過自己是億萬太子爺的身份，其父親身家相當豐厚，阿正要撐老婆出碟絕對冇難度！其實Sherine 2014年已經轉做歌手，不時有公開演出，聽過其歌喉的均大讚有「港版Adele」的影子！既然老婆有天賦，阿正亦撐到底，最近讓Sherine簽約老友農夫的唱片公司老闆DJ Tommy任經理人，自己更協助作曲及擔任唱片監製，早前出席活動已不時提到老婆將出碟，做足事前宣傳。
夜蒲孖老友密斟
為了幫老婆出碟「開路」，阿正最近更頻頻帶老婆夜蒲，介紹音樂圈好友讓她認識。日前凌晨12時多，兩人翹到實離開夜店，Sherine一臉開心，如同開籠雀般說不停。兩人行去附近的士站等車，由於人龍超長，阿正為免老婆呆等，愛妻號的他即時取出電話call車，未幾便有車駛至，兩人齊齊登車回家溫馨。
幫埋老婆交學費
對於被指會被打造成「港版Adele」，Sherine難掩興奮，接受記者訪問時連聲表示「唔敢當」，問到是否老公打本出碟，她說：「唔係淨係錢嗰方面，早排我去咗3次紐約學唱歌，老公都好支持，都有幫我畀埋學費。（隻碟搞成點？）依家已經錄好咗歌，都影埋封面𠻹。」及至問到老公是否富有家族時，Sherine即支吾而對，並說：「呀，錢方面我唔知喎。」隨即匆匆收線。
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
