娛頭
狼死帶小三返屋企 《東張》李潤庭背妻偷食
《東張》主持李潤庭，與任職空姐老婆 Crystal Wong結婚五年，表面是個好老公，實情已經瞞住老婆，收埋小三接近一年！老婆工作關係，經常要四圍飛，李潤庭更加肆無忌憚，公然在赤柱大街狂啜小三，還將手插入小三短褲袋肉緊揸籮，收工約埋小三痴纏搭港鐵，完全唔怕俾人撞破，更離譜是趁老婆出 trip，帶小三返屋企，登堂入室，做到咁盡，賤男中的賤男！
扮晒好老公
《東張》主持李潤庭，去年十二月由有線電視過檔無綫，在方丈余詠珊護蔭下，做主持外，更獲安排客串拍劇，曝光機會多，令不少師奶觀眾都認得，對他有印象。
一一年，李潤庭與任職國泰空姐的老婆 Crystal Wong結婚，表面同另一半好恩愛，卻原來是正宗賤男，秘交小三接近一年，更猖狂到偷食唔抹嘴。
十一月二十四日，李潤庭與太太結婚五周年，他在 fb放上當年結婚相，留言：「 Happy 5th Anniversary」，扮晒情深。不過，第二日（二十五日） Crystal一飛走，李潤庭便帶小三返去同老婆位於荃灣的愉景新城愛巢。
當日，李潤庭如常返電視城主持《東張西望》，直至晚上八時多收工離開電視城，搭城巴出將軍澳站，原來小三已一早在 Popcorn商場徘徊等候。
痴纏列車
城巴抵達將軍澳站後，李潤庭刻意企在路邊一個凹位食煙，小三自動波現身會合，兩人食完煙一齊行去搭港鐵，返回李潤庭荃灣愉景新城寓所。由於車廂內冇乜人，二人坐低後，小三一直繑實李潤庭，又成個身挨落他身上，車廂痴纏，之後車廂開始人多，李潤庭雖然下意識耷低頭，但仍任由小三黐實。
前後腳上樓
但一返到愉景新城商場，兩人就刻意分開，李潤庭先去百佳買嘢，女方則獨自搭𨋢上樓，二人鬼祟前後腳，相信是要避開大廈管理員耳目，免得管理員察覺，向真李太報寸！
其實早於今年八月中，本刊已經發現李潤庭趁老婆不在港，帶小三返屋企偷食，小三入埋屋， Crystal完全被蒙在鼓裡。
啜嘴揸籮
夠膽帶小三返屋企，李潤庭偷食毫無顧忌。七月中，二人公然在赤柱大街約會，在餐廳一支啤酒兩份飲，對住一身吊帶背心加熱褲的戰鬥格小三，李潤庭投晒降。
埋單走人，二人輪流去廁所，女方之後在餐廳外食煙，李潤庭跟住一齊扯，邊扯煙邊調情，兩個攬埋一嚿，李潤庭突然一手捧住小三下巴，拉埋就嘴，女方冧爆伏在他膊頭詐嬌，左手在李潤庭腰間狂掃，之後李潤庭更將手插入小三短褲褲袋，摸住 pat pat再嘴過，其間還肉緊到揸籮，完全將老婆拋諸腦後，亦當街上途人透明。
開火嘈交
狼死連環偷食的李潤庭，對住結婚五年的正印亦唔好老脾。據 Crystal身邊好友透露，近幾個月，李潤庭經常借故發火同老婆嘈交，更經常不瞅不睬。
「 Crystal根本唔知 Eric（李潤庭）外面有女人，但佢話最近同老公好少事都嗌交，老公亦變得好冇情趣！」
要密密招呼戰鬥格小三，李潤庭對正印當然冇貨賣！
九月九日早上，李潤庭開工前都要約小三見面，二人在 Popcorn的 Starbucks飲咖啡時，頭貼頭一齊睇手機，其間還摸住小三手不停掃。
燶面陪老婆
小三係寶，老婆係草！今年八月，李潤庭帶老婆返加拿大探親一星期，八月三十一日早機返到香港，只見 Crystal打電話 call的士，行去停車場等車，推住行李車的李潤庭，全程揦口揦面，相對同小三一齊的興奮，判若兩人。
男人偷食，最無恥莫過於此！
已婚偷食男
圈中有不少已婚男，會趁住老婆一時睇唔實，四出偷食嗒女，最終搞到婚姻破裂。
彭順
15年，背妻偷食小三 Liddy，二人於圓方拍拖睇戲，又攬又錫，旁若無人，事件爆出後，彭順即甩小三飛馬來西亞補鑊，最終獲李心潔原諒。
力捧主播
現年 37歲的李潤庭，加拿大卑詩大學經濟學系畢業，曾於溫哥華新時代電視任職新聞主播， 03年回流香港，先後加入有線及亞視，任職新聞主播，其後轉做娛樂新聞台主播。 11年，李潤庭與拍拖五年的空姐女友 Crystal拉埋天窗。去年加入無綫，已有機會拍劇客串《愛•回家之八時入席》，今年初，無綫《東張西望》改革大換血，一班老臣子被踢走，李潤庭接任主持，一星期做足五日，受無綫力捧。
撰文、攝影、攝錄：娛樂組
|
鍾意就快D Share啦！
|
|
|
