2016年12月15日 星期四

嘉頓第三代 張嘉慶為創業由低做起 [壹週刊 - 1397] __,張嘉慶,M1,

嘉頓後人張嘉慶搞傳統粵菜食府為創業作,由搵鋪到設計,一手一腳跟到足。名人動態嘉頓第三代 張嘉慶為創業由低做起張嘉慶是嘉頓第三代後人、張王幼倫兒子,有位在商場、ball場都指揮若定的將軍媽媽,他脫下律師袍進軍飲食界卻毫無家庭壓力。「反而我俾自己最大壓力,因為唔想失敗。」他說。八十後的他,跟五十多歲的前順德聯誼會名廚陳日生拍住創業「星月居」,集傳統與新派兩代之力,把講求功夫的粵菜發揚光大。為取經,他不 ...


嘉頓後人張嘉慶搞傳統粵菜食府為創業作,由搵鋪到設計,一手一腳跟到足。

名人動態

嘉頓第三代 張嘉慶為創業由低做起

張嘉慶是嘉頓第三代後人、張王幼倫兒子,有位在商場、 ball場都指揮若定的將軍媽媽,他脫下律師袍進軍飲食界卻毫無家庭壓力。

「反而我俾自己最大壓力,因為唔想失敗。」他說。

八十後的他,跟五十多歲的前順德聯誼會名廚陳日生拍住創業「星月居」,集傳統與新派兩代之力,把講求功夫的粵菜發揚光大。

為取經,他不惜在米芝蓮餐廳做待應,熨枱布、洗廁所一腳踢。

名門之後有爭勝心,「希望父母以我為傲!」

創業動用私己錢

作為嘉頓第三代後人,張嘉慶( Adrian)理應是家族生意的「繼承者們」,但在劍橋大學畢業後,由做律師,到今日創業開餐廳,一直外闖。

「呢刻我只想專注創業,想在外面攞多啲經驗先。若果畢業就返去,我覺得冇乜意思,係人都知你係邊個。所以之前去啲國際性嘅律師樓打工,比較實際啲(吸取經驗)。」事業方面,二十七歲的 Adrian有自己一套。

含住銀匙出世,但 Adrian創業用自己積蓄,更凡事親力親為。今年中,他隱藏嘉頓後人身份,靠個人實力投得美食車!

「冇諗過用屋企個名,當然有個名會幫到好多,但我希望自己創出成就,就係想睇吓靠自己得唔得。」

訪問當日,在餐廳忙完午市, Adrian便拉着裝修師傅跟進維修工程,由一塊損耗的地板,到趟門鬆了一口釘,他都瞭如指掌,非常上心。

脫下律師袍,進軍飲食業,但他不覺得八年的法律工作經驗被浪費。「讀書時已知自己有創業心,但唔知邊行,相信讀 law,對日後做任何生意都有用,唔會嘥咗時間。」

放棄高薪厚職, Adrian也曾掙扎。「始終做咗律師幾年,有途徑升上去,依家由零開始,係有過少少隱憂,會疑問呢個係咪啱嘅選擇。」

兒子的事業,媽媽張王幼倫從不插手,任由他選擇走自己的路。

07年,只有十八歲的張嘉慶跟媽媽現身 ball場,轉眼間他今天已成舵手。

名氣父母賦予自由

身為珠寶設計師的張王幼倫出名要求高,媽咪長袖善舞,在 Ball場甚有地位;父親張力正則是心臟科名醫,父母的成就,可會有壓力?

「應該係推動力!反而係我俾自己壓力,想要做到最好,唔想失敗。因為父母俾咁大自由我,我更加想要做好啲,令佢哋以我為傲。」

在外國留學多年, Adrian卻選擇以傳統粵菜投身飲食界,跟曾任名人飯堂順德聯誼會的大廚陳師傅拍住上。

事實上,陳師傅的巧手菜,好多名人政客追隨, Adrian由細食到大。「細個唔識感激一份美食背後付出嘅功夫,人大咗就懂得欣賞。當我有創業念頭,咁啱又遇到呢位大廚想換個環境,大家一拍即合。」

早前他以個人身份,跟多間大集團拗手瓜競投美食車,花數月時間跟拍檔研製西式叉燒包,負責試食的張太為個仔食足幾個月叉燒,好在最後勝出。

仙姐同阿嗲當日都來到賀,從不干預兒子事業的張太,在背後默默支持。

本月初嘉慶創業的粵菜食府正式開幕,連旅發局局長林建岳都出席撐世姪。

做侍應取經 洗埋廁所

返香港前, Adrian一三年在英國一間米芝蓮餐廳做過侍應。

「枱布都要熨,洗埋廁所,乜都做,因為我想乜都學,又真係學到啲好實際嘅嘢。做咗一個月,開頭好辛苦,因為唔慣企十幾個鐘,收工隻腳攰到行唔到。」

由低做起,令他對員工多了一份體恤。

「之前喺英國間餐廳成日要抹鏡,到我自己搞餐廳,就叫設計師唔好整咁多鏡面,否則員工要日日抹。餐具,我要靚得嚟實用;好似茶壺好靚但太重,我就會換過輕啲,等班同事容易斟。

「之前都冇諗過原來好多嘢真係唔識,裝修師傅講嘅嘢,又唔知信定唔信好!創業過程最難係信人,可能做過律師,乜都要證據,有晒條例,要立即改變以前思維方式去做嘢,先係最大難度。」

張太會為一場慈善晚宴的佳餚,走遍大江南北搜羅優質食材。兒子張嘉慶亦會為身後每個擺設,到處搜購,做事絕不馬虎。

魄力媽媽

做珠寶設計的張王幼倫,除有自家品牌 Carnet,還早已揚名海外。 06年她打低全球設計師,為電影《達文西密碼》設計戲中的神秘鑰匙及珠寶。

10年張太成立「領賢慈善基金」,推動音樂及文化藝術,還多次邀得郎朗及李雲迪參與籌款晚宴。

13年她辦的慈善晚宴,除讓三百位嘉賓一嘗多間米芝蓮星級名廚炮製頂級晚餐。晚宴後還被安排到紅館,欣賞一場與別不同的陳奕迅演唱會。當日一家之主張力正率仔女捧場。

同老師傅磨合

八十後遇上五十幾歲老師傅,雙方最需要時間磨合。

「有意見唔同,但我完全信任佢,佢亦信我呢個負責樓面嘅拍檔。我希望中菜可以配搭埋餐酒,佢最初對呢個諗法有啲唔係太習慣,因為以前冇做過,但佢好好,抱開放態度,大家有商有量。」

粵菜餐廳取名為「星月居」,代表他重視拍檔。「用星字,因為陳師傅個名叫『日生』,月係取自『悅』同音,亦代表過往大廚做晚飯筵席嘅成功,居係因為我喜歡家嘅感覺。」 Adrian說。

讓孩子走自己的路,張太除支持兒子創業,長女詩賢(右一)於劍橋畢業後,現於時尚品牌的東南亞區擔任採購,二女詠賢(左一)於倫敦大學畢業後,現於小學任教。

為創業,嘉慶的認真程度,是曾在英國米芝蓮食府當侍應取經,樓面工作包括埋洗廁所。

王牌傳統功夫粵菜

星月居的菜式並冇散叫,只有全席套餐,最低消費約六千元一席。

大良炒鮮奶拼野雞卷

蝦子柚皮拼鵝掌

玻璃蝦球

生炒糯米飯

食客變拍檔

五十多歲、極低調的大廚陳日生,在舊公司守了幾十年,原打算登陸後求變,卻遇上 27歲對飲食有團火的張嘉慶。就因那年輕小伙子一番話:「因為你煮嘢好食,我希望俾年輕一輩可以嘗到你嘅傳統粵菜。」打動陳師傅的心。陳師傅的巧手成就張嘉慶的創業,同樣他的幹勁也為老廚師締造精彩的下半場。

「星月居」的房間設計簡約舒適,張嘉慶正正想為追隨陳師傅的客人,一嘗巧手菜同時,還提升環境質素。

撰文:盧韻琴

攝影:黃志明、吳少輝


鍾意就快D Share啦!
Related Posts Plugin for WordPress, Blogger...