今年57歲嘅「TVB廚神」李錦聯，喺大台服務咗25年，係師奶節目《都市閒情》嘅台柱，佢主持嘅「今晚食乜餸」環節，吸引唔少師奶日日坐定定追看。不過，《蘋果》收到消息，李錦聯做埋今個月，就會離開無綫，以後喺《都市閒情》，想聽到李錦聯講金句「靠得住」，或者想睇佢同安德尊呢對加埋過百歲嘅活寶，喺節目中「隔劍」，示範「無敵鴛鴦鏟」場面，將成絕響！(新聞連結：http://bit.ly/2gdIJ2r )對於劈炮唔撈，《蘋果》日前打俾李錦聯，佢大方承認做埋今個月底，就會離開大台。李錦聯話：「始終自己年紀有番咁上下，諗住想休息吓享受吓人生，其實兩個月前有試過同監製講，話原本一個禮拜做兩日《都市閒情》，可唔可以減到變一日，但監製話做一日太少，咁我就話不如停一停」一間公司做咗20幾年，或多或少都會有份感情，李錦聯對無綫固然有份唔捨得之情。但做到意興闌珊亦係離開大台嘅原因之一。李錦聯話：「之前同大王(安德尊)拍《區區有伙》，原意係想我同佢喺節目你窒吓我、我寸吓你，啲觀眾最想睇呢啲啫，咁我同大王都有啲火花嘛，講嘢有時踩吓界、玩吓諧音，例如大王飲嘢，我就順口問句：『你仲乜『飲』嘢？』其實我冇講粗口㗎！不過監製話唔批，可能佢哋覺得個節目放喺合家歡時間啦，佢哋驚俾人投訴，所以咪cut走呢啲對白囉，咁你知啦，寫稿嗰班後生仔唔敢揹飛嘛，會寫啲唔會瀨嘢嘅對白，搞搞吓，我都冇乜心機做，佢哋話講乜就講乜」離開大台，李錦聯話「可惜一定有」，但自己亦唔想固定咗個框框，成世做煮餸佬。「我諗出面10個人有9個半都知我教煮餸，但其實我出面都有好多嘢做，幫好多餐廳、廚具做代言搞推廣，再唔係休息一排，會有一個新形式，試吓自己喺網上做條飲食channel都未定呢！」
|
鍾意就快D Share啦！
|
|
|
