老婆佗B六個月撞車49歲蘇永康：嚇到標屎！
恭喜恭喜！49歲的蘇永康（阿公）昨日宣布與老婆馮翠珊造人成功，老婆已懷有慈姑椗六個月，有仔送終！不過，他大爆40歲的太太屬高齡產婦，上周遇上驚險車禍，當時他「嚇到標屎」，幸而母子平安，他即大讚：「It's a lucky baby！」
現年49歲的歌手蘇永康與任職時裝品牌Alexander McQueen亞太區總裁的老婆馮翠珊（Anita）明天迎來結婚兩周年，昨日宣布喜訊，透露老婆已懷孕6個月，更一索得男！昨日他接受本報電話訪問時透露，太太的預產期是明年4月2日，與4月4日出生的老婆生日相近，又自嘲老來得子，坦言想不到會有仔生：「家族兩個阿哥都冇小朋友，以為蘇家到呢代就完結，點知有仔送終，好聽啲就叫繼後香燈，相信老竇在天之靈都好開心！」他又笑言要取消退休計劃，努力賺奶粉錢，不過依然會買靚衫。
行善報答老天爺
Anita屬高齡產婦，阿公悉心照料，但大爆老婆上周發生驚險事，事緣腹大便便的Anita放工後坐司機車回家，期間遭另一架車迎頭相撞，他說：「嚇到我標屎呀！佢都有驚一驚，但之後好冷靜咁打畀我，話咩事都冇，亦都唔需要入醫院檢查，最緊要人冇事，BB冇事，It's a lucky baby！」他透露車輛損毀嚴重，連倒後鏡都被撞爛，維修費要十多萬，疑有人失誤已報警處理，他一定法律追究到底，並笑言：「我最鍾意搵律師跟進。」老婆與腹中「蘇蝦」逢凶化吉，向來低調行善的阿公表示會繼續做更多善事，報答上天眷顧。
阿公透露婚後一直有造人計劃，更曾向唱片公司老闆任賢齊請一年大假，偕老婆到意大利、威尼斯及杜拜等地旅行造人，可惜未能成功，老婆數月前卻突然告知有喜：「女人每個月都有件事，嚟唔到咪去Check，一Check就有喜！」為免「蘇蝦」小器，未夠3個月，他們對親友亦三緘其口，第一個得知喜訊的，原來是差不多時間佗B女的謝安琪，他說：「我哋互相報喜，我仲同張繼聰講笑，話不如玩指腹為婚！」
搵拉姑教湊仔
提到早前相約狄波拉（拉姑）取育兒經，他直認不諱：「學定教仔，謝婷婷同謝霆鋒都好有禮貌，所以特登約咗佢做指路明燈，從來冇心理準備做老竇，好想知道拉姑點樣可以將一個咁反叛嘅細路，教到咁有禮貌！」又笑言希望BB似老婆：「因為老婆靚，我就醜樣到阿媽都唔認得！」
其實早於阿公宣布太太佗B前，本報日前已捕獲這對準父母拍拖行街！據知兩人當日約了朋友吃晚飯，挺巨肚、面圓圓的Anita步伐緩慢，披上外套亦難掩孕味，阿公則主動為她拿紙袋，不過他非常論盡，東西左跌右跌。
文：音樂組
攝：追蹤組
|
鍾意就快D Share啦！
|
|
|