秋生周博賢開火 互譏出局
昨日特首選委會選舉點票結束，有份爭奪文化小組（15席）的黃秋生和「樂壇長毛」周博賢皆敗北，兩個男人卻由選戰變罵戰，秋生寸爆周博賢經常廢話連篇，除了消費梁振英之外沒第二招，周博賢則反擊秋生提梁振英的次數比自己更多，更暗嘲秋生得票包尾致以安慰，結果被秋生狠插：「呢啲咪懶係禮貌嘅虛偽嘢！」
■黃秋生昨在選委會的文化小組得票包尾，並斥周博賢安慰他低票落敗表現虛偽。資料圖片
特首梁振英上周五忽然宣佈放棄競逐連任，令特首選委會的選戰更激烈，昨日公佈點票結果，黃秋生和周博賢分別有份競逐文化小組，可惜鎩羽而歸，敗給由汪明荃、鄺美雲等組成的「文化共融小組」，秋生更得票包尾，他昨在facebook揞名寸爆周博賢：「我真係冇法再忍受聽嗰啲廢話，除咗攞梁振英嚟消費仲有冇第二招……人哋都話唔選咯，冇咗呢條反梁大計，諗過第二條橋啦，十下十下。」
■樂壇長毛周博賢暗寸秋生提到梁振英的次數更多。資料圖片
藝發局選舉結怨秋生和周博賢不和，始於今屆藝發局選舉，秋生輸給跟周博賢有連繫的李俊亮，對於被秋生在社交網揞名狂寸，周博賢昨在電話反擊秋生：「其實我哋成本小冊子，梁振英出現次數可能只係一次，唔係好多，可能佢status提梁振英次數，比我哋成本小冊子提嘅次數更多。」昨日獲423票的周博賢更潤爆獲216票包尾的秋生：「我都欣賞佢出嚟參選呢個行動，最後以低票落敗向佢致以安慰。」
周博賢重申其15人組成的「文化同行」政綱：「我諗佢都係針對一般泛民，即係ABC（Anyone but CY）策略陣營，我哋唔係ABC，我哋係BC，而反對梁振英連任只係我哋嘅政綱其中一個啫，我哋嘅政治立場係反對人大831、反對立法會功能界別嘅制度同爭取真普選。」
■黃秋生曾在12年出席梁振英的新書發佈會。資料圖片
■周博賢和李俊亮上月在藝發局選舉中挑機成功，擊敗了黃秋生。資料圖片
製造反梁偽命題昨日電話訪問中，秋生反駁周博賢：「佢哋（文化同行）唔喺小冊子提嘅，喺啲訪問，周博賢即係當咗自己代表晒14個，係代表人物。其實我唔係剩係講佢，我又冇指名道姓，我係講成件事，佢哋係一組人，你可以摷返之前佢哋係講ABC。」
忍到現在才爆seed的秋生，強調這是邏輯問題：「忍忍忍，點解忍到𠵱家至講呢啲，因為之前參選緊，費事攞啲嘢嚟話人。𠵱家冇官一身輕，覺得佢哋創造咗一個廉價符號『反對梁振英連任』，呢個係偽命題，因為梁振英冇話過出嚟選，即係我話反對米奇老鼠做特首一樣，係假㗎嘛！」
秋生直斥周博賢拿着「我是一個反抗者」的招牌，吸引人去支持，反而不做正事，秋生說：「即係代表文化界，我唔提文化政策，只要我提反梁振英，就係一個hero，大家唔使做其他嘢啦。」更狂插周博賢恭喜自己低票落敗虛偽：「我梗係低票落敗，唔係你以為我會高票當選，呢啲咪懶係禮貌嘅虛偽嘢，大家聽字面都聽到啦。」
至於跟周博賢雙雙落選，秋生說：「弓唔好張得太滿，說話唔好說得太死，之前啲囂張跋扈，聽聞有人話攞晒15席，嗰啲咁嘅說話邊度講得㗎。」
採訪：皓騫、何永寧
|
鍾意就快D Share啦！
|
|
|
