特首梁振英日前喺特首辦見記者，以保護同照顧家人為由，宣佈唔會爭取連任。當時麥明詩喺facebook留言，話自己「收到一份大禮」，事後有人話佢有暗喻，之後麥明詩亦咁講過梁特：「聆聽民意係好事！」(新聞連結：http://bit.ly/2igY7QS )同梁特政見，睇嚟有啲出入嘅麥明詩，你又點估得到，原來同梁特個細女頌昕，竟然係同學兼老友！日前下晝5點半，有讀者潘小姐透過「爆相爆片」，見到麥明詩同梁頌昕，同行仲有一女三男，一行6人喺圓方溜冰場出現。據潘小姐表示，6個人最初喺冰場一字排開咁溜，玩到咁上下，頌昕就一個人自己向前溜，至於麥明詩就大部份時間拖實同行嘅另一個女仔。潘小姐話：「睇得出佢哋之前有玩開溜冰，唔算好叻，但起碼溜得好順吓，我見麥明詩仲識得轉圈㖭！」但係麥明詩自己就好謙虛，喺IG貼咗轉圈失敗嘅片，仲跌埋落地下。而自從4月行李事件後（新聞連結：http://bit.ly/2hwtMOr )，一直冇喺香港俾人影到嘅頌昕，喺圓方溜冰時，就全程笑容滿面，之前嘅「我爸係梁特」或者近排家姐齊昕秘密入院，似乎都無損今次頌昕返港渡假嘅心情！其實麥明詩同梁頌昕，當年喺英國劍橋係同校同學，雖然大家唔同系（麥明詩係法律系、梁頌昕係經濟系），不過原來佢哋都係「劍橋大學香港及中國事務會」中擔任幹事，唔怪之得咁老死！
來源 source: http://s.nextmedia.com
|
鍾意就快D Share啦！
|
|
|