現年28歲嘅大隻仔趙勁皓（King）同細一年嘅o靚模出身嘅盧頌之（DaDa），2013年合作電影《爆3俏嬌娃》撻着，DaDa近日仲為King陀女6個月，預產期係出年3月。King同DaDa有喜，但男方口快快講咗話原來係畀DaDa一年時間，冇得生就分手，就係呢番戲言，惹嚟網友圍插King大男人，視DaDa係生仔機器，網友替女方不值。DaDa噚日夫唱婦隨，陪King去旺角巡視新鋪，DaDa為King解畫：「佢話泵唔大唔要我係講笑，我哋相處係咁，成日互窒，其實佢係暖男，唔係搵我做生仔機器，佢試下囉。」DaDa其實恨做媽咪，呢次如願，佢好開心，仔女都咁鍾意，King好坦白：「我想要仔，但呢胎係女，所以會再生，希望有兩個，一仔一女。」囡囡係爹哋前世情人，King話：「o依家成日上網睇湊女，我心情都興奮，我想準備好啲，請定陪月同司機。」囡囡仲係趙家第一B，所以一定視佢如珠如寶。 King講番早前同DaDa去做產檢，見到囡囡喺肚中郁郁吓，感動到喊，DaDa寸King：「但你嗰時掛住打機囉，希望我生，你陪我入產房，唔係掛住打機。」King承諾一定陪DaDa入產房，但仲考慮會唔會剪臍帶。King其實好有計劃，佢會喺DaDa生產前先入紙註冊，然後明年待佢生後收身，再同佢出埠影靚靚結婚相同後補擺酒。DaDa係咁叠埋心水做成功男人背後嘅女人，佢話：「我生完都會做嘢，幫King打理生意，佢燥底又怕煩，我幫佢打理生意，幕前冇乜特別。」DaDa表示陀B後定性咗，BB亦令佢同King感情更穩定，佢哋o依家乜都家庭為重，有女萬事足。
| （攝影：陳俊強） | | |
| |
|
鍾意就快D Share啦！
|
|
|
