今季周末連環好波停不了，另一個Super Saturday打到嚟喇！今次先上演英超榜首大戰，曼城主場鬥車路士，車仔最後以3:1反勝拆城，繼續排榜首。全球矚目嘅西甲傳統大戰，巴塞隆拿主場同勁敵、西甲「1哥」皇家馬德里嘅「國家打吡」，亦都已經開波喇！唔使捱夜喎，你梗係要追到實一實
即時睇卡爾希靚爆老烏：http://bit.ly/2gRPPOp
即時睇車仔下半場點樣撳3粒：http://bit.ly/2gzekj0
【1:06】 巴塞隆拿 1:1 皇家馬德里 全場完
皇馬入波之後，巴塞又得到絕殺罰球，門神基羅拿華斯衝出嚟打手錘不遠，巴塞沙治羅拔圖禁區外頂個波入去博一博，好在卡斯米路護空門，唔係艦隊今次就要空歡喜一場喇！
【01:03】 巴塞隆拿 1:1 皇家馬德里
巴塞入極都入唔到第2球，完場前真係出事！皇馬喺90分鐘得到罰球機會，莫迪歷罰球傳中，隊長沙治奧拉莫斯再次做救世主，一頭頂爆巴塞，場波仲未完呀！
【00:54】
後備上陣嘅恩尼斯達，82分鐘畀個靚波美斯，可惜後者腳頭無靈，射門連目標都唔中。巴塞始終入唔到燕梳，小心皇馬乘虛而入呀！
【00:40】
尼馬喺68分鐘左路單騎推進，扮落底線推返入中路，皇馬守將畀佢Fake到飛開一邊，但係呢位巴西國腳面對龍門一腳勁射衝天，正一大嘥鬼！
【00:25】 巴塞隆拿 1:0 皇家馬德里
巴塞先開記錄！53分鐘主隊左路得到罰球機會，尼馬斬入6碼位左右，蘇亞雷斯一頂破網，呢場悶戰終於有嘢睇喇！
【00:02】 巴塞隆拿 0:0 皇家馬德里 半場完
國家打吡半場完結，雖然互有攻守，但係激烈程度遠遜英超「雙藍會」。巴塞暫時同艦隊兩無記錄返更衣室。
【23:53】
皇家馬德里喺35分鐘，莫迪歷喺中場截走巴塞傳送，搵到C朗，後者半場推到入禁區，怒射近柱但被巴塞門神達史迪根救出。
【23:38】
比賽過咗20分鐘，雙方都開始入局，「銀河艦隊」今場中場都打得幾粗野，美斯多次中招，成個人都躁埋。開波受制嘅皇馬，踢到上半場中段，亦開始多咗攻勢，不過都係冇乜入肉埋門。
【23:26】 巴塞隆拿 0:0 皇家馬德里
巴塞10分鐘喺皇馬門前引起一輪混戰，但係冇人起到最後一腳，冇辦法先開記錄。不過，雙方開始搏槌喇！
【23:00】 巴塞隆拿 vs 皇家馬德里
今晚Super Saturday重頭戲，當然係西班牙國家打吡，巴塞隆拿主場火併死敵皇家馬德里由於巴塞落後「銀河艦隊」6分，今仗可謂不容再失，「MSN」美斯、蘇亞雷斯及尼馬齊齊擔正開火，但啱啱好番嘅隊長「小白」恩尼斯達先做後備，由安祖高美斯打正選。另一邊廂，皇馬王牌C朗梗係有份，拍住賓施馬造訪魯營球場，而剛傷愈嘅中場悍將卡斯米路，亦於後備席候命，以莫迪歷、高華錫及艾斯高組成嘅中場攻強守弱，唔通主帥施丹今仗以攻代守？
巴塞隆拿正選陣容
門將：1達史特根
後衞：20沙治羅拔圖、3碧基、14馬斯真蘭奴、18佐迪艾巴
中場：4拿傑迪錫、5布斯基斯、21安祖高美斯
前鋒：10美斯、9蘇亞雷斯、11尼馬
皇家馬德里正選陣容
門將：1基羅拿華斯
後衞：2丹尼爾卡華積、5華拉尼、4沙治奧拉莫斯、12馬些路
中場：19莫迪歷、16高華錫、22艾斯高
前鋒：17盧卡斯華斯基斯、9賓施馬、7基斯坦奴朗拿度
【22:25】 曼城 1:3 車路士 全場完
呢場大戰最後先見紅！阿古路唔知係咪見曼城輸波條氣唔順，推甩腳之後雙腳夾落包抄嘅大衞雷斯，雙方球員即刻起衝突！過程之中，費蘭甸奴出手推法比加斯，最阿古路同費蘭甸奴，最後畀球證一人一張紅牌，直接趕咗出場。球證管理好雙方之後，場波重開冇耐就完場，車仔全取3分繼續排榜首！
【22:17】 曼城 1:3 車路士
曼城追極都追唔到，仲畀車仔一盤冷水照頭淋！主隊領隊哥迪奧拿為咗追番個球，換晒攻擊球員入嚟，但係追唔到之餘，仲畀夏薩特突擊得手，車仔呢3分穩陣囉！
【21:57】 曼城 1:2 車路士
車路士71分鐘一個反擊，2個打4個都掂；迪亞高哥斯達一個靚直線，令到韋利安得到單刀機會，後者亦冇辜負迪哥妙傳，再度射破巴禾十指關。
【21:46】 曼城 1:1 車路士
迪布尼一射中楣，曼城搵唔到燕梳球，車仔就追和喇！法比加斯喺自己半場一腳長傳，送迪亞高哥斯達入禁區，迪哥心口一控就甩開奧達文迪，射破哥迪奧巴禾一氣呵成，靚嘅程度比卡希爾OG，有過之而無不及！
【21:15】 曼城 1:0 車路士 半場完
曼城完半場前先開紀錄！藍月亮快翼捷西斯拿華斯，右路突破傳中，本身個波只係中腰波冇乜威脅，點知車仔中堅加利卡希爾死都唔用生蟲左腳，半車身右腳一嘢射番自己龍，泰拔高圖爾斯完全估唔到隊友咁傻仔，只可以睇住個波直飛左上角.......主隊半場暫以1球領先。
【21:04】
曼城攻勢開始入肉，大衞施華中路笠個過頭波，入楔嘅利萊辛尼彈畀阿古路，後者施射畀車仔守將擋出。
【20:55】
曼打咗20分鐘左右，有次黃金機會，奇雲迪布尼開出罰球，費蘭甸奴插水式一頂破網！點知越在先，食個詐胡。呢邊詐胡，藍戰士就嚟喇！夏薩特一個反擊，單騎連門將都過埋，但係Ball out，佢唔貪心傳中，無人接應，突擊無功而還。
【20:30】曼城 vs 車路士
曼車戰開波喇！賽前全場一齊為喺哥倫比亞空難喪生嘅查比高恩斯球員默哀一分鐘，賽前曼城眾將亦有着上查軍Tee以示哀悼同支持。
【20:20】
雖然要到11:15先睇到國家打吡，但係《東網》今次為大家嚟個大解讀，點解依家隊巴塞搞唔掂皇家馬德里！詳情可以去睇：http://bit.ly/2gLAnAL
【20:00】曼城 vs 車路士
今晚Super Saturday有英超「雙藍會」打頭陣，由曼城主場火併「1哥」車路士，今仗兩軍都用343陣式，曼城前線用捷西斯拿華斯同奇雲迪布尼支援射手阿古路，而自變陣343後聯賽7連勝嘅車仔，因防中尼曼查馬迪受傷，主帥干地焗用久疏戰陣嘅法比加斯代替佢，隨時牽一髮而動全身畀「藍月亮」有機可乘。
曼城正選陣容
門將：1哥迪奧巴禾
後衞：30奧達文迪、24史東斯、11高拉洛夫
中場：19利萊辛尼、8根度簡、25費蘭甸奴、21大衛施華
前鋒：15捷西斯拿華斯、10阿古路、17奇雲迪布尼
車路士正選陣容
門將：13泰拔高圖爾斯
後衞：28艾斯派古達、30大衞雷斯、24加利卡希爾
中場：15域陀摩西斯、7尼高路簡迪、4法比加斯、3馬高斯阿朗素
前鋒：11柏度洛迪古斯、19迪亞高哥斯達、10夏薩特
|
鍾意就快D Share啦！
|
|
|
