女星李曼筠（Maggie）每年都會炮製新春大餐，今年亦不例外，以露肩低胸裝上陣的她親自去街市買料，落手揀生猛海鮮、蔬菜及生果，更到雞檔揀雞，Maggie細心地聽檔主教如何揀新鮮雞，又毫無懼色拎起肥雞拍照，有養寵物的Maggie馴服動物果然有一手，繼往年成功氹蟒蛇氹馬匹，今次她一拎大肥雞上手，肥雞都聽聽話話，老闆娘也稱讚她夠大膽又叻女。
新正頭着紅底
Maggie表示自細就很愛吃，長大後則對落廚非常好奇，經常入廚房請教媽咪，在近年兩母女會齊齊研究賀年大餐，她謂：「好似最近我哋整煲仔飯，都會一齊研究點整好啲。」講到新年習俗，Maggie堅持要年廿八洗邋遢，新正頭穿紅色內衣褲，以及會給她的幾隻貓咪壓歲錢：「親友嚟我屋企拜年，佢哋都會畀利是我啲貓，我會幫貓咪儲起，第時用嚟買貓糧同睇醫生。」身材有點「脹爆」的Maggie笑言她易肥易瘦，由中秋開始就是儲肥的日子，新春佳節更要「過肥年」，一於要食得好懶理減肥，她笑說：「我冇刻意節食，寧願做更多運動，冇話肥啲定瘦啲靚，最緊要均勻，同個人開心，過量節食有時令自己抑鬱，早幾年為減肥唔食嘢，甚至聞到香味都反胃，嗰個階段唔健康。」
繼續唔拍拖
講到新一年願望，Maggie希望可兼顧主持及拍戲，而一月已開了一個好頭：「已經接咗啲工作，會主持節目，之前拍咗套戲就二月上映。」此外，她想做幕後及一些跟演藝事業無關的工作：「都開始有啲方向。（搞生意？）類似，但未公開得住，生肖運程話我今年事業順利，係一個行動年，做咗係有回報，所以要更加努力！（感情方面呢？）安排咗咁多工作，希望今年繼續唔拍拖，將啲桃花放晒去工作度，唔好冇啦啦走個拍拖嘅人出嚟呀！」
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
