型男張智霖（Chilam）去年工作排山倒海而至，主持內地綜藝節目、拍戲、拍劇、演唱會及廣告代言等忙得不可開交，難怪他笑指全年放得約兩星期假，然而有付出自然有回報，Chilam荷包豬籠入水，有指保守估計全年收入逾億。
踏入雞年，相信他持續強勢，繼續「丁財兩旺」。談到逾億收入，他引用《周易》卦辭答：「實際（收入）就唔好講喇，但我相信『天道酬勤』呢句說話嘅，總之機會係留畀有準備嘅人，多一分耕耘自然多一分收獲，做人千祈唔好懶就得啦。」
為電影放棄靚仔形象
Chilam打趣表示自己是藝人，職責是娛樂大眾，多謝粉絲們多年來對自己的支持及喜愛，並承諾雞年不會放慢腳步，目前已落實接拍3、4部電影，將集中火力向影壇出擊！就如近日他為支持港產片製作自毀靚仔形象：「戲裏面我扮演的士司機，要負責『處理』林家棟遺體。為配合角色造型，我自行增肥十幾磅，夜晚有覺又唔瞓，經常諗啲負能量嘅嘢，去到片場塗黑個眼圈先埋位，依家電影煞科喇，農曆年間我就唔可以再饞嘴，希望戒口再配合做運動，快啲回復番原本嘅我。」
好友蔡一智一家每年都為細心地為張宅送上賀年花，今年亦不例外，張太袁詠儀（靚靚）特意為「禮物」拍照並上載到微博寫道﹕「夫人（蔡一智太太）話花開富貴，蘭花品種有大有細，寓意再添人口，承你貴言！」
若造人成功會停工一年
問到Chilam是否為添雞B「努力中」，他直言不諱：「作為佢（靚靚）嘅另一半，除咗我冇人幫到佢，咁我唔應該拒絕佢嘅，不過家庭成員數目係上天賜嘅，所以凡事隨緣，平常心啦。」
Chilam坦言經過囝囝魔童出生後，自己發現培育一個小朋友所花的心血很多，不過自己亦能從兒子身上獲益良多。他直言倘若靚靚成功有孕的話，自己亦會與上次一樣，宣布停工一年！談到會被打亂工作安排，大智若愚的他笑謂：「咁真係要協調嘅，不過我相信天無絕人之路，況且點都係好事同喜事嘛，相信大家會明白。（生番個女，等第二時同媽媽一樣成為香港小姐？）哈哈，真係承你貴言喇！」
這位「愛妻號」更難忘靚靚懷魔童時口味突變：「女性懷孕周期無論情緒同胃口都同平日好唔同，係需要照顧嘅。佢試過半夜三更想食某啲嘢，我好樂意做外賣仔，喺物流方面幫吓手咁囉。咁有上次嘅經驗，如果再有嘅話有經驗喇，唔會再咁踢腳囉。」相信Chilam在心理上已做足準備功夫，隨時迎接新生命的到來。
髮型﹕Vic Kwan@ii Alchemy
化妝﹕Hetty Kwong
服裝﹕Ted Baker
場地提供﹕ii Alchemy
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
