2017年2月2日 星期四

命格 面相 大比併 [壹週刊 - 1404] __,M1,

玄學家周漢明點評四位特首參選人面相,佢就最睇好林鄭。(莫智謙攝)八卦陣命格 面相 大比併新年流流,唔少人都鍾意睇吓風水命理,《壹》仔今次就搵玄學家周漢明,講吓四位特首參選人嘅命相。不過,老土啲講句,風水命理唔係精準科學,信不信由你。仲有七年玩周師傅話,呢四位參選人,其實都係「相靚命好」之人,但相比之下,「好打得」林鄭月娥,似乎略勝一籌。「先講佢命格,命格係正官格,所以做官做政府嘅嘢,最合適。」周師 ...


玄學家周漢明點評四位特首參選人面相,佢就最睇好林鄭。(莫智謙攝)

八卦陣

命格 面相 大比併

新年流流,唔少人都鍾意睇吓風水命理,《壹》仔今次就搵玄學家周漢明,講吓四位特首參選人嘅命相。不過,老土啲講句,風水命理唔係精準科學,信不信由你。

仲有七年玩

周師傅話,呢四位參選人,其實都係「相靚命好」之人,但相比之下,「好打得」林鄭月娥,似乎略勝一籌。「先講佢命格,命格係正官格,所以做官做政府嘅嘢,最合適。」周師傅話,佢啲官運厲害到由廿八歲行到六十七歲。林鄭今年剛好六十歲,即係仲有七年玩?!

周師傅話,林鄭八字生得正,面相亦無得彈。「佢嘅印堂好[闊、又飽滿,做官做得好高級;佢又顴鼻相配,個鼻大細適中,又有啲肉;眼神就好好,好藏嘅;嘴角經常微微笑,向上。呢啲都係屬於高官嘅風範嚟!」

今年係丁酉年,有粒九紫星到,九紫星代表女人,代表飽讀詩書嘅女人,唔通香港真係會出現首位女特首?

行財運唔係官運

至於其餘三位候選人,根據周師傅點評,薯片叔叔似乎唔似係做特首嘅材料。「面相輸蝕印堂(額頭中間位置)有少少凹;個下庭位(下巴)稍為唔夠兜,塊面又削少少。」面相唔夠林鄭飽滿,今年六十六歲嘅薯片叔叔,嚟緊呢幾年,原來係行財運。「佢六十五歲之後開始行財運,唔係行官運,所以一六年臨年尾佢辭職,啱啱個大運行晒,反而第日有啲大機構請佢!」

太率直好輸蝕

周師傅又話,胡官條命同曾俊華差唔多,行完官運轉緊行財運,加上對眼太大、眼珠又凸,顯示佢個人太率直。「對眼稍為大咗啲,我哋就叫有少少露,意思係呢個人好率直,驚佢講嘢輸蝕,做特首就唔係咁合適。」

國家一定有安排

至於話過就算戰死沙場,都唔會退縮嘅葉劉,周師傅話佢其實都係行緊官運,而且仲會行到八十四歲,師傅仲話:「林鄭如果唔玩,佢係第二個有機會做特首嘅人。」之但係,葉劉個嘴就有少少累事。「佢印堂、顴鼻、眉眼都好靚,所以佢之前都係做高官。但係去到下庭(下巴),講嘢有少少歪,有少少塌,因為食倉、仙庫(人中附近)同埋法令個位唔夠飽滿,所以就輸蝕咗!」

但係周師傅強調,就算佢做唔成特首,其實都唔使憂,因為國家好大機會有嘢安排俾佢,例如撈吓政協呢類職位喎。

怪人處處有 選舉特別多

今屆特首選舉,其實唔係得胡官、鬍鬚曾、林鄭同葉劉呢四位參選人;截至過年前,已經有七位人士表態參選。究竟另外嗰三位係乜料?之唔係騎呢搞局分子囉。

睇番選管會為今次選舉開嘅網上中央平台,其實仲有兩位參選人,分別係簡惠芬同劉子頴;另外,仲有一位泰國華僑王耀萱,亦都喺上週三開記招宣布參選。

奧巴馬都識我

劉子頴為咗參選,唔單止放棄居英權,仲公開埋自己 fb,佢就話唔怕被起底喎!

呢三個人究竟係咩來頭,《壹》仔就問過早喺上年十一月初已經正式宣布參選嘅劉子頴。佢劈頭一句就話參選係因為睇唔過眼「香港俾梁振英搞到亂晒」,政綱主打政改,仲話自己雖然係「 one man band」加零選舉預算,但好有信心有足夠提名票入閘,仲話到時先會公開見傳媒。

根據阿劉生公開嘅個人背景,佢過去從事電腦相關工作,近年就做保安員,早年曾到美國升學,亦有居英權,但就為咗今次參選已經放棄咗。

呢位劉生無乜人識,咁究竟點攞提名呢?劉生就上晒腦咁話:「連奧巴馬都識我。」仲話自己平日網上論政,連國際形勢都俾佢影響到。但現實係,佢承認決定參選前,曾經電郵泛民選委摸底,但冇人覆佢囉!

同習近平組成銅牆鐵壁

王耀萱喺記招展示自己嘅「威水史」,包括同曾蔭權及梁振英嘅合照。(翁少陽攝)

至於另一參選人王耀萱,網上資料竟然顯示,佢自封「中共中央海外辦公廳主任」,而習近平就係佢入室弟子,又聲稱成立「中華民族國家危機處理委員會」,發出嘅第一號文件就係宣布由胡錦濤、溫家寶負政治責任,而委員會曾邀請三十多個國家領袖同全球精英參與烏克蘭、香港政改、泰國等危機調停,佢本人更同習近平、奧巴馬、普京組成「銅牆鐵壁」。

最有經驗參選人

○二及○五年兩度宣布參選嘅簡惠芬,今屆再接再厲,亦應再次經歷入閘失敗的結局。

另一位參選人簡惠芬,網上資料顯示佢從事金融保險業,佢就應該係全港最有經驗嘅特首參選人,因為○二年同○五年嘅特首選舉,佢都有宣布參選,選舉經費仲用咗幾萬蚊,主要用嚟喺婚紗店影咗輯參選用嘅證件相。

撰文:巫不言

news@nextdigital.com.hk


鍾意就快D Share啦!
Related Posts Plugin for WordPress, Blogger...