無綫編導岑應新作《有樓萬事足》，節目未出街就已再度成為話題。唔會吝惜驕人身材，經常作低胸性感打扮嘅22歲妙齡少女Seasun，港女金句一浪接一浪，不單講明擇偶條件係有樓，而且2000呎大屋係好基本，更話「冇樓嘅話就唔好白撞」、「買樓係表達愛意嘅手法」，最爆嘅一句係「有樓就有高潮」！噚晚財經雜誌《港股策略王》，就搵咗Seasun去做直播，本來係諗住畀個機會佢平反，點知越講就越慘不忍睹。問到佢係咪真係覺得「買樓係表達愛意嘅手法」，Seasun完全冇否認，話真係覺得咁，「結婚一定有財產分配，有樓較容易你中有我，我中有你。」佢又話，「如果佢冇時間陪我嘅，佢咪用第二樣野，或者第二個方法去代替呢樣野。」訪問間，佢仲不停強調「其實我好貼地」，又話「2000呎啫」、「都係想有個竇，有瓦摭頭，有個露台曬下衫，有得BBQ，我好鍾意整蛋糕，得閒有啲人嚟，十幾廿人都容納到，下面係一個公開啲地方，上面就private啲，做睡房。」「貼地」嘅Seasun更堅稱覺得2000呎單位好基本，係因為自己堅稱去過一個何文田恒信園1500呎複式單位，只售860萬元。翻查資料，現時恒信園建築面積1,350呎單位，叫價約1650萬元。訪問間，連主持陳承龍都忍唔住問「你覺得自己有冇條件，去換到2000呎單位？」Seasun就話：「Who knows？可能有啲難，不妨一試，所以就靠你哋啦。」掌握財經生活資訊，即Like「蘋果ATM」fb專頁
http://fb.com/appledailyatm
|
鍾意就快D Share啦！
|
|
|