拍足4年《愛‧回家》系列嘅郭少芸，由孻姑姐馬柔演到製作總經理雲飛飛，每次角色設定一開始都係單身貴族，好彩臨結局都畀佢搵到個好歸宿。現實中，48歲嘅郭少芸至今仍未結婚，同好姊妹佘詩曼一樣都聲稱係單身。不過新一年，郭少芸嘅異性緣似乎都幾旺，噚日凌晨兩點幾，佢喺微博貼咗張同三個壯男一齊跑步嘅合照，留言：「雞年第一跑─龜速。」沿住吐露港公路跑到去大埔海濱公園嘅回歸紀念塔，跑咗足足個幾鐘。原來跑完之後仲有下文，上周五(3日)讀者潘先生透過《蘋果》「爆相爆片」，話見到郭少芸同其中一個有啲啲似張智霖嘅壯男現身大埔新達廣場，估計郭少芸先撇甩其餘兩位男士，只係載住呢位橙色運動衫嘅肥版張智霖離開。潘先生話：「當時大約5點幾，見到郭少芸同個男人一齊搭扶手電梯上新達廣場，佢哋都係着住運動裝，個男人比較熟路，帶住佢(郭少芸)去廁所。」其中一張側面相，見到郭少芸好似繑住個男人手臂，潘先生話：「可能係角度問題，因為佢哋警覺性都好高，全程雖然行得好埋，但就冇拖手。」之後二人行咗去富雅花園方向，沿途都有好多街坊認得郭少芸，回頭望多幾眼，潘先生話：「郭少芸好雀躍，途經富雅花園就不停手指指，跟住郭少芸入咗停車場攞車，而個男士就企喺閘口食煙，等郭少芸揸車出嚟載佢走。」睇番郭少芸個Ig，原來呢位男士已經唔係第一次陪郭少芸跑步，之前郭少芸仲貼咗同對方背對背合照。有口痕友留言問郭少芸呢個係咪男友！見得咁密，行街又咁秘密，其實都唔使問啦，呵！
| 郭少芸同「脹爆Cool魔」跑步後，就揸車載埋對方離開。(讀者潘先生提供圖片) | | |
| | | |
| | |
|
鍾意就快D Share啦！
|
|
|
