人妻Kay(謝安琪)嘅第二胎仲有唔夠兩個月就出世喇，老公張繼聰梗係緊張，早前出活動時話預咗自己見到囡囡時會變成「癡漢」，連做嘢都會心掛掛。一家四口當然要有個安樂窩，據聞張氏夫婦一向以2萬8千蚊租住比華利山，08年趁金融風暴樓價跌嗰時，就以1,200萬買咗屋苑其中一幢4,000呎獨立屋長住，能夠飽覽吐露港海景，間屋有幾大有幾靚，想像到。新一年，張繼聰似乎都唔再收收埋埋，頻頻喺ig晒大屋內部嘅豪華裝修，繼大年初二貼咗張同囝囝張瞻一齊打機嘅相，雖然只有背影，但網民已經睇到「嘩嘩聲」，因為個大廳樓底高度逾10呎，放咗兩張凳喺中間，大到連梳化個影都見唔到.......。年初四，成班好朋友蕭正楠、黃翠如、方力申、黃宗澤、林盛斌等又去咗張家屋企作客，令飯廳又意外曝光，容納2、30人真係綽綽有餘，左手邊仲隱約見到牆上嘅「Family Love」貼滿一幅又一幅家庭照，真係一個充滿愛嘅家庭。到咗噚晚近12點，張繼聰又係網上貼咗一張兩父子一齊沖涼嘅相，個浴室好似酒店一樣咁華麗，浴缸足以容納兩個人。見囝囝張瞻好努力咁為老竇擦背，張繼聰就好疏乎咁話﹕「養兵千日，用在一時！」咁溫馨嘅場面，梗係有唔少人葡萄啦，有網民留言﹕「個浴室大個我間房呀！」、「屋企超大！」、「好似酒店咁靚！」大家都估計張相係由謝安琪親自操刀拍攝，連Kay都畀咗個like自己。
|
鍾意就快D Share啦！
|
|
|
