慈善伶王新馬司曾（鄧永祥）同第四任太太祥嫂洪金梅嘅長子鄧兆尊，雖然唔係高大靚仔，但就絕對御女有術，兆尊除咗有大婆Carmen同二奶車厘子（Cherry）之外，祥嫂洪金梅早前更踢爆兆尊有個揼骨妹三奶（Claire）。喺舊年12月，兆尊就被傳媒發現佢同時間同大婆、二奶及三奶一齊去灣仔，大享齊人之福。（新聞連結：http://bit.ly/2kJokbF）前日係兆尊50歲生日，佢就繼續享齊人之福，同大婆 ...
慈善伶王新馬司曾（鄧永祥）同第四任太太祥嫂洪金梅嘅長子鄧兆尊，雖然唔係高大靚仔，但就絕對御女有術，兆尊除咗有大婆Carmen同二奶車厘子（Cherry）之外，祥嫂洪金梅早前更踢爆兆尊有個揼骨妹三奶（Claire）。喺舊年12月，兆尊就被傳媒發現佢同時間同大婆、二奶及三奶一齊去灣仔，大享齊人之福。（新聞連結： http://bit.ly/2kJokbF ）前日係兆尊50歲生日，佢就繼續享齊人之福，同大婆Carmen、二奶車厘子以及三奶Claire同枱食飯慶祝，同場仲有兆尊細佬妹小艾、兆榮同碧玉，以及阮兆祥同女友Crystal等成班好朋友。據知佢哋廿幾人喺銅鑼灣廣場翠園訂咗兩圍，原本兆尊以為只係同細佬妹以及三個女友食飯慶祝，去到先知原來成班老友畀驚喜佢。前晚佢哋一如以往咁男還男、女還女分兩枱食飯，大婆Carmen坐喺二奶車厘子同碧玉中間，Claire就同車厘子隔住位女性朋友坐。聽聞成晚Carmen同車厘子不停傾偈，但佢兩個就同Claire冇乜交流，Claire只係好靜咁坐埋一邊，真係好識做。切生日蛋糕嗰陣，Carmen同小艾企咗喺兆尊隔籬，車厘子同Claire就企喺後面，而大合照嗰陣，成班人舉起隻手代表兆尊入「五」，Claire亦好識做地靠邊站。噚日《蘋果》打畀壽星公兆尊，問佢有乜生日願望？佢話：「一家人健健康康，女朋友們和和氣氣囉！」問佢幾個女朋友唔和氣咩？兆尊笑話：「唔係！想繼續和氣啫！」前晚同3個女友一齊食飯，咁到最後點咗邊個盞燈？佢哈哈笑話：「呢啲咁私人嘅嘢！我唔會公開講囉！唔好問我呢啲嘢」至於有份去祝賀壽嘅阮兆祥，被問到兆尊三個女友都有出席時，佢笑話：「一家人齊齊整整啦。」問佢羨唔羨慕齊人之福時，祥仔再笑住講：「嘩，呢啲唔係羨唔羨慕嘅問題，佢係經過專人訓練，同埋呢個唔關乎能力，係關乎緣份問題。」
