三亞陪女食早餐
吳啟華返港 冧攬囡囡
經歷兩次失敗婚姻的吳啟華，與第二任嫩妻石洋子育有8歲獨生女吳熙兒，離婚後要做帶子洪郎的他，日前陪「前世情人」到又一城行街，又買玩具又扮鬼臉冧攬囡囡，十足老竇奴；回復單身後的吳啟華，雖然年屆52歲，但外形仍風度翩翩，日前更被網友直擊帶新歡在三亞食早餐。
【二人世界】
吳啟華日前與8歲囡囡熙兒去又一城，更買了一盒LEGO給她。DV圖片
吳啟華當年在無綫經典劇《妙手仁心》扮程至美醫生，被封師奶殺手，3年前跟細自己21年的內地老婆石洋子離婚，結束了第二段婚姻，兩人的8歲女兒吳熙兒由二人共同撫養。吳啟華有空就盡老竇責任做帶子洪郎，日前他被本報目擊在又一城湊女行街。
現年8歲的熙兒越大越似媽咪，當日兩父女現身商場搭扶手電梯，嗲爆的熙兒肉緊攬實爸爸，吳啟華露出冧爆表情，更扮鬼臉𠱁囡囡；之後熙兒在扶手電梯擺出芭蕾舞動作，似乎有學芭蕾舞的她向爹哋炫耀舞姿，鬼馬的吳啟華即擺出大鵬展翅甫士搞笑，兩父女齊齊大笑，溫馨滿瀉。吳啟華帶囡囡去小孩至愛的玩具反斗城，逛了不久，熙兒就攬着一盒LEGO禮物離開。吳啟華順勢搭着囡囡膊頭，有了玩具忘了爹哋的熙兒，似乎嫌爸爸阻着她看玩具，竟然揈開爹哋隻手，吳啟華不死心再搭囡囡膊頭，十分搞笑。
【溫馨抱抱】
吳啟華被囡囡攬實，即露出一臉冧爆表情。
【扮嘢𠱁女】
為博囡囡一笑，吳啟華示範一招大鵬展翅。
【陪買玩具】
吳啟華陪囡囡行玩具反斗城。
新歡約20多歲
回復單身的吳啟華雖年過半百，但外形依然好弗，去年被爆孖前妻遊日本惹復合傳聞，但他堅稱與石洋子只是家人關係，更自爆有拍散拖，但他的散拖情人一直未曝光。直至情人節前4日，有網友在三亞的洲際度假酒店，目擊吳啟華和女子食早餐，該女子年約20多歲，戴cap帽着T恤牛仔褲，身形纖瘦。
昨記者問啟華是否有女朋友？他在電話說：「朋友嚟啫，去三亞做嘢，我成日都周圍去啦，今日夠喺東莞同個女人食早餐，日日都同人食早餐，個個都係我女友咪好唔得閒。夜晚同拍戲女演員食飯，又女友咩？」
【本月10日 新歡曝光】
本月吳啟華被網友發現於三亞洲際度假酒店與女伴食早餐。微博圖片
吳啟華前年與石洋子離婚，不過仍會結伴外遊，關係融洽。資料圖片
孖前妻遊澳洲
記者祝他早日搵到一生中最愛，啟華笑說：「唔好啩，我唔係好想搵，呢啲都係算啦，拍吓散拖算，唔好搵個最愛，一陣最愛又麻煩。」接着他傳來一張林寶堅尼四驅車的相片，笑說：「暫時𠵱家呢架最愛，哈哈哈。」問是否買了愛車？他說：「呢啲靚嘅嘢唔係一定要擁有，我好辛苦㗎，啲錢唔可以亂咁揮霍㗎！」
問到日前攜女兒行又一城，他說：「囡囡喺東北讀國際學校，早排佢放假，我哋帶咗佢去澳洲玩，喺澳洲返香港留幾日，陪佢去行街，買啲嘢畀佢。」之前與前妻帶女兒去澳洲玩？吳啟華坦白說：「係呀，仲有外婆，其實𠵱家都幾好，一家人幾融洽。」
採訪、攝影：孔志豪
|
鍾意就快D Share啦！
|
|
|
