報稱傾合作商機公私拍住上 麥明詩坐街等約會 神算外孫：佢笑得好甜
【淺水灣】25歲十優港姐麥明詩和林作疑轉玩地下情，身邊觀音兵卻排隊湧現，繼跟蔘茸藥房太子爺坐茶餐廳後，前日輪到鐵板神算董慕節外孫張存華上場，兩人被直擊在拍拖勝地淺水灣蜜會談心兩粒鐘，昨日神算後人接受本報訪問時，大讚麥明詩叻女、笑容又靚，印象好到加零一。
【閒逛搵食】
■麥明詩前日與董慕節外孫閒逛商場。
【玩機呆等】
■麥明詩前日單拖現身淺水灣，不停撳手機似乎佳人有約。
【冧女有計】
■麥明詩與神算外孫入了cafe撐枱腳，麥明詩不時露甜笑。
麥明詩於女拔挾10A成績入讀英國劍橋大學法律系，畢業後返港參選2015年港姐選舉，以大熱之姿壓倒性封后，但她跟律師男友林作的「明作戀」卻幾經風浪，去年傳出三年情疑似玩完，之後兩人多次被影到見面，似乎轉玩地下情，兩人身邊亦各自出現新歡，麥明詩的裙下之臣更加浪接浪，前日被本報直擊孖新歡大隻男浪漫遊淺水灣。
■麥明詩挾10A之銜當選港姐冠軍，有身材有樣貌有高學歷。資料圖片
調笑有一手前日下午約4時許，記者發現麥明詩單拖現身淺水灣商場外，當時見到麥明詩神情有點悶悶不樂，獨個兒不停撳手機，似乎在等人打發時間，大約半小時後，一位外表俊朗的男士匆匆現身，麥明詩見到他即露出笑容，兩人還握手問好，似乎是新識的朋友，不過兩人揀在拍拖勝地淺水灣約會，似乎有無限發展空間。
兩人首先閒逛商場，之後入了一間cafe撐枱腳，他們揀了店內後面的靠牆座位，全程互望談心足足傾了兩粒鐘。大隻男似乎好識冧女，見到麥明詩不時露出甜蜜笑容，埋單之後還並肩行到停車場。
據知，麥明詩的新歡名叫張存華、英文名Emil，乃有「董半仙」之稱的董慕節外孫，他在體育公司擔任營銷經理，還為樂視做NBA評述及節目主持。前日麥明詩回應傳媒時表示：「同佢今次係第一次見面，佢做Marketing PR，約出嚟只係睇吓大家有冇合作機會，去淺水灣係因為方便我架車叉電。」至於林作回覆似劃清界線：「我啱啱新年同屋企人去咗蘇梅旅行，佢嘅嘢唔回應啦，我乜都唔知。」
至於新歡Emil昨在社交網貼健身相晒肌，網友留言：「10A大隻仔男友」、「40吋巨胸」，Emil接受《蘋果》電話訪問表示：「梗唔係40吋胸，佢哋鍾意玩嘢，噚日第一次見啫，我哋喺活動上識。」問到何時認識？Emil支吾說：「唔好問啦，我好驚媒體影響我同佢嘅朋友關係。」是否想追十優港姐？他緊張說：「唔好咁講，好大壓力，我覺得佢好叻女，但唔可以見佢一面就即刻追佢，識耐啲先啦。」
「同女拔啱傾」問到麥明詩是否他的那杯茶？Emil坦言：「佢係叻女，我係鍾意叻女，覺得佢好nice，好好人，好有才華，笑得好甜，眼又大。佢又英國返嚟，幾特別㗎，而女拔萃又出強人，我老細都係女拔，所以我覺得自己同女拔女仔幾啱傾，我好欣賞叻嘅女仔，𠵱家香港咁複雜，女強人係一個魅力。」跟林作拗手瓜？Emil說：「唔會，唔會同人哋搶，我做好自己嘢先。」問到外公是否董慕節？他避答：「家庭事想低調一些，謝謝。」
採訪、攝影：徐錦池、孔志豪
|
鍾意就快D Share啦！
|
|
|
