(新增影片)耍喺fb做一日紅人，幾咁易，只要你揀啱timing。今朝一早，手執鮮花嘅Iron Man已經出動，俾網民野生捕獲。咦，金鐘站又見佢企喺碌柱旁邊等，尖嘴又見佢棟喺度等，究竟女朋友過海定唔過海等你？就連健吾都share(冇錯，健吾絕對係一個指標……)圖中那位幸運女生，在Iron Man強勁臂彎下竊喜，Iron Man手抱花束，享受周遭羨慕目光。然後網民開始起底，嘩好sweet呀好閃呀咁。男主角叫做Paul Ho，仲好開心豬咁接受傳媒訪問，話自己正職設計師，又話自己今朝喺月台企咗十幾分鐘，已經好多人搵佢合照，仲話今日特登向公司請兩個鐘頭假送花，而呢個重約40磅嘅盔甲，係佢用三個幾月一手一腳整，仲多次鎅傷手。多麼的感人。
然後有人發現呢個阿Paul係有老婆。但佢今日接受某報訪問時，故意引導令人信佢同Fion係男女朋友關係，又指兩人於動漫節結緣，相識約一年。然後有人發現，呢個阿Paul，係黃——夏——蕙——契仔。佢背後有間公司，就係黃夏蕙嗰間(亦即係整容失敗嘅艾美琦所屬嗰間)。而相中匿喺Paul強勁臂彎下的女仔，嚴格而言，係一個寂寂無名嘅0靚模，叫Fion黃淑瑩。網民形容之為「奀星」。依家係「新晉歌手」。曾出寫真。亦有人發現，Paul，曾自稱電影領班，間公司叫Galaxy Movie銀河電影。即係…
一切係一個局……細心網民發現，Fion根本係Paul旗下藝人，係咩「Paul's Venus Princess」其中一個Princess，唔係Paul嘅所謂女朋友。如前所述，Paul根本係有老婆。《蘋果》搵夏蕙姨問究竟契仔Paul搞邊科？佢好嬲咁話：「作為我契仔契女，做呢啲咁賤格嘢真係要兜巴星，佢咁做影響其他契妹，同埋契媽我呀！今日情人節，佢有家室唔應玩呢啲曖昧嘢，咁唔好嘛令人誤會。」究竟夏蕙姨係唔知情，定係夾埋0架？問夏蕙姨可介意Paul用你契仔名搞搞震？佢就話：「認得佢上契，借個名幫佢冇所謂，但唔係可以亂嚟！」搞清楚Paul同Fion唔係搞不倫戀、而係講大話呃like之後，夏蕙姨先至唔嬲：「咁就算！」至於講大話唔眨眼嘅人夫Paul接受《蘋果》訪問時就承認，「我搞開event，旗下不嬲有6到8個女仔，而Fion係我近期愛將，今日我專登cosplay去送花畀佢驚喜，大家做娛樂圈都明係小宣傳玩吓。我同太太結婚20年，噚晚送咗花畀老婆，完全唔係背妻偷食。」又話太太好支持佢。夏蕙姨鬧爆佢「做呢啲咁賤格嘢」，Paul就話要負荊請罪、係咁打畀夏蕙姨，仲搬埋阿媽出嚟：「阿媽都成日話我大細路…純粹娛樂大家的小小事情……」散場喇！
| (互聯網圖片) | | |
| | | |
| |
|
鍾意就快D Share啦！
|
|
|
