達明一派P頭海報被詐型下架 明哥轟亂扣政治
在香港成軍三十一年的達明一派，現年54歲成員黃耀明因黃絲身份被封殺，下月假紅館舉行的演唱會零贊助，原來連一張合成海報都要被下架，原因是出現在海報上的某位藝人，怕被認為撐明哥撐黃絲，恐懼會打爛內地市場的金飯碗，無形之手令海報消失！達明一派昨穿上被下架的海報tee現身，對於海報被亂扣政治，明哥說：「呢個恐懼係一個傳染病。」
■達明一派下月舉行的紅館演唱會海報，以多位政要及藝人等相片與達明頭像拼接而成，惟海報其中一位藝人詐型而要消失。
三年前，黃耀明站上前線撐雨傘運動，結果被封殺趕絕，不獲林建岳的寰亞唱片續約，下月假紅館舉行三場「達明一派卅一派對」演唱會，因明哥的政治立場關係，完全找不到一個贊助商，主辦機構環球唱片獨力承擔製作，還以為達明排除萬難可以開騷，怎知前晚明哥在fb貼港鐵的個唱海報，並留言：「原來這個社會真的有人甚麼都恐懼，他們恐懼到一個地步，連跟我們站在同一個照片框內都怕得要死，所以最後唔知『係人定係鬼』那『無形的手』令到這張宣傳海報要下架、消失了。」
■劉以達（左）及黃耀明昨身穿下架海報tee現身商台受訪，表示事件早在農曆新年前發生。
■The Beatles的《Sgt. Pepper's Lonely Hearts Club Band》唱片封套是達明海報的靈感來源。
8大詐型嫌疑藝人
達明一派昨日身穿被下架的海報tee現身商台接受訪問，明哥坦言事件於農曆新年前發生，問到哪個單位要求下架？他說：「係相片裏面其中一個人，佢同主辦機構講唔開心，因為佢出現海報上面，佢唔想出現，又話我哋冇問過佢，主辦都有同佢解釋，啲相買咗版權，海報上每個人都加咗劉以達同我嘅五官上去，變咗另一個人，但佢都好驚，驚內地工作受影響，我哋都覺得好唔合理，因為已經做晒所有手續，但考慮到對方咁驚，所以最後決定將海報下架。」據知該投訴的藝人在內地有很多工作，而在這海報中出現，而又符合條件的有曾志偉、周星馳、陳奕迅、黎明、劉德華、鄭秀文、周杰倫及梁朝偉。
明哥笑言如果要恐懼，是否出現在海報上的特首參選人林鄭月娥及曾俊華會更驚，他嘆道：「其實呢張海報係一個笑話，估唔到連笑話都承受唔起，覺得非常非常之遺憾，但諗深一層覺得好恐怖，因為都冇任何嘢發生，只係嗰個人自己好驚，呢個恐懼其實係一個傳染病。」問對方有否向達明致歉？明哥諷刺說：「我諗差啲我哋要同佢say sorry，我都願意嘅，如果佢真係冇飯開。」
有人擔心政治問題明哥讚主辦環球唱片：「唱片公司都係受害者，人人都有寒蟬效應，㩒住自己個嘴。」明哥指演唱會主題圍繞《1984》這本書，籌備過程已被監控和自我審查：「下星期派嘅新歌都係講呢樣嘢。」問會否怕有媒體不敢播？達哥大笑：「咁就要跳樓啦。」明哥有感而發：「就嚟特首選舉，23條都要關注，如果真係立法，社會一定會被監控。」
究竟無形之手是誰？主辦的環球唱片董事總經理黃劍濤在電話說：「真係唔講得，至於海報呢件事，相片係同雜誌買番嚟有晒版權，但其中一位藝人經理人擔心政治問題，所以我同明哥商量之後，尊重對方亦明白對方，所以決定將海報下架。」另外，港鐵回應本報查詢時，指港鐵網絡廣告由委託的廣告代理公司承辦，確保廣告符合香港法例及廣告業界守則。
採訪：馬建華
攝影：仇志德
|
鍾意就快D Share啦！
|
|
|
