掃呢頁CODE去手機

2017年3月9日 星期四

長毛話選特首 拖慢籌款進度 [壹週刊 - 1409] __,長毛,特首,梁國雄,M1,

毛哥話參選,搞到守護公義基金捐款數字插水,幸最近官司開審才回復正常,不過跟五百萬目標仲差好遠。八卦陣長毛話選特首 拖慢籌款進度為四位被DQ議員司法覆核 ...


毛哥話參選,搞到守護公義基金捐款數字插水,幸最近官司開審才回復正常,不過跟五百萬目標仲差好遠。

八卦陣

長毛話選特首 拖慢籌款進度

為四位被 DQ議員司法覆核官司開支籌錢的守護公義基金,而家只係籌到三百五十萬元,距離第一階段的五百萬目標,仲有好大段距離。

話說上年年底成立的守護公義基金,今年元旦日遊行曾籌到二百萬元,但最近捐款數字明顯停滯不前,據知原來同長毛梁國雄宣布參選特首有關,基金發起人陳健民話:「毛哥參選時有啲爭議,可能有啲中產未必鍾意,嗰段時間係少咗啲。」幸好最近官司開審,加上長毛唔夠公民提名宣布棄選,捐款數字暫時回復正常,希望到今年七一時,能夠籌得夠。

不過,就算籌到五百萬其實都唔夠用,因為案件雙方用上星級大狀團,單係第一審,都可能需要五、六百萬元,而法援申請只得長毛獲批,但佢仍然需要俾成一百二十萬元墊底費,政府用公帑去欺負民選議員,難怪陳健民炮轟:「完全唔對等,無公義可言。」

藝術家撐基金 幫得幾多幫幾多

守護公義基金而家只係籌到三百五十萬,有排未到目標,惟有諗吓計搞啲新意,由議員同藝術家捐出物品做網上拍賣。

經常喺遊行同集會現場繪畫油畫嘅 Perry Dino,就捐出兩幅畫咗年廿七、年廿八維園年宵盛況嘅畫作,佢話呢兩幅畫無咁大政治色彩。「或者佢(買畫嘅人)政治立場唔係咁鮮明,都起碼有幅賞心悅目嘅畫。」他說從來不賣自己的畫作,但今次覺得四位議員「值得幫」,「幫得幾多就幾多」。

另一個捐出作品的藝術家,是前攝記梁祖彝,佢捐出一個「香港魚盤」。所謂魚盤其實是假魚,皆因以前窮人買唔起真魚拜神,惟有用代替品。「用自己方法解決自己想要嘅嘢,我覺得呢個態度好適合今日嘅香港,唔再求佢(政府)啦,亦都唔好諗佢會幫到你啲乜。」

佢仲話︰「畫條魚喺盤度好似唔足以詮釋香港呢個狀態,彷彿個盤係個困局,條魚困喺裡面,依然係困住。」所以他今次捐出嘅作品有啲唔同,「條魚跳出來,打破呢個困局。」

經常在遊行集會出現的 Perry Dino,從來不賣自己的畫作,但今次破例捐出右面兩幅關於年宵市場的作品,他希望能吸引更多人競投。

前攝記梁祖彝早在佔中時已想將「香港魚盤」送給三子,更想藉作品寄語香港要跳出困局。

湯家驊同林鄭 ConnectED 做完球證再助攻

民主思路星期日晚搞咗首場特首選舉論壇,而召集人湯家驊,早已公開撐林鄭,政圈甚至傳言如果林鄭當選,湯家驊係律政司司長人選,結果湯家驊喺呢場擂台戰,真係分明大細超,搭晒個台俾林鄭做騷兼幫手助攻,林鄭亦當正係自己主場。

其實論壇開波前,林鄭個 facebook競選專頁已經咁寫︰「林太將進行首場行政長官候選人辯論,胡國興先生將會出席。」有晒主客之分。當論壇一開始,胡官主動去同三個主持握手,唯獨林鄭好有官威咁企定定喺咪前,等主持行埋去;到論壇完場,由於場外尚有示威者,民主思路麥嘉晉就親自幫林鄭護駕,但就冇安排任何人幫胡官囉。

身為論壇主持之一嘅湯家驊擺明有晒立場,對住胡官毫不客氣咁質問,甚至打斷對方發言,但向林鄭提問時,語氣就相當溫和,幫到出晒面;林鄭回應問題時,亦親切咁叫湯家驊做「 Ronny」,仲不避嫌咁話,「我依家明點解另一候選人(曾俊華)唔嚟,我同湯家驊嘅公共理財睇法近乎一致。」公開同隊友相認。

其實呢場論壇仲有個安排失當位,就係本來由胡官作最後發言,但臨場變咗係林鄭,變相俾機會佢趁胡官冇機會回應再出招!湯家驊事後雖然話係搞錯咗,但唔知呢個錯係有心定無意。正如胡官總結時講, connect前提係要有 respect,但做咗「奶粉」嘅湯家驊,似乎真係唔識呢個字點解。

鬍鬚曾缺席,林鄭與胡官兩位候選人正面交鋒,但林鄭卻視這論壇猶如自己主場,論壇開波前更企定定在咪前,等主持行埋去握手。

民主思路召集人湯家驊早已公開撐林鄭,這場論壇,亦擺明幫林鄭助攻助守。

外國屎月賣八千 高過香港最低工資

有人捐血,有人捐精,甚至有人捐卵,但講到最近全城最熱一定係捐屎!有間亞洲益菌中心最近喺香港開檔,搵人參加腸道益菌捐贈計劃,每捐一次屎可以獲車馬費二百蚊,計計埋埋每月最多可以用屎賺到四千八百元。

不過,屎唔可以隨便捐,因為要過五關斬六將,肯定夠健康先捐得。雖然大家聽落會覺得有啲核突,但其實捐屎喺外國一早已經有,標榜每五十克屎可以醫到一個人。《壹》仔仲發現,外國唔只月亮特別圓,連啲屎都特別貴。

就好似喺美國波士頓的非牟利機構 OpenBiome,一三年開始成立了公眾屎銀行( public stool bank),鼓勵民眾捐屎去研究裡面的微生物組,每次「出價」四十美金,如果一星期去足五日,仲多五十蚊獎金,換言之,一年最多可以因屎獲利一萬三千元,即係成十萬港紙,計番每月有八千四百蚊,仲高過香港最低工資。

一樽樽「便便」睇落核突,但經過提煉可以醫人,每五十克屎可以醫到一個人,屎量愈大,幫到人愈多,但前提係捐屎者要夠健康。

有公司在港呼籲市民參加腸道益菌捐贈計劃捐屎,每捐一次可以獲車馬費二百蚊,原來屎,真係可以變黃金。

撰文:巫不言

news@nextdigital.com.hk


鍾意就快D Share啦!