掃呢頁CODE去手機

2017年3月16日 星期四

帶老公見家長 王君馨親證已簽紙 [壹週刊 - 1410] __,君馨,王君馨,M1,

日前王君馨同甚少蒲頭的「未婚夫」Daniel手拖手在淺水灣出現。探熱針帶老公見家長 王君馨親證已簽紙「處女黨」輪流嫁,繼李亞男、鍾嘉欣、岑麗香先後做人 ...


日前王君馨同甚少蒲頭的「未婚夫」 Daniel手拖手在淺水灣出現。

探熱針

帶老公見家長 王君馨親證已簽紙

「處女黨」輪流嫁,繼李亞男、鍾嘉欣、岑麗香先後做人妻,排住隊仲有王君馨。三十歲的王君馨,上年十一月同圈外男友 Daniel入紙註冊,換言之,三個月內要簽紙。眨吓眼,大限已過,原來 Grace同 Daniel已經秘密簽紙完婚。

新婚冇耐, Daniel就已經來港定居,早前 Grace帶埋 Daniel同親戚見面,同行仲有 Grace爸爸,二人沿途十指緊扣, sweet爆!

唔肯嫁去美國

Grace講到明唔肯嫁去美國,惟有犧牲老公,在紐約做 banker的 Daniel,為咗娶「處女馨」,決定放棄高薪厚職來港定居。上月中, Daniel已正式來港,更搬入 Grace位於將軍澳寓所,展開新婚生活。

一直甚少蒲頭的 Daniel,日前更同 Grace手拖手在淺水灣出現,當日下午四點,二人從餐廳步出,沿途一直十指緊扣,同行更有 Grace的一班親戚,一行人食完 lunch,之後 call Uber離開,臨走前 Grace父親更拍一拍 Daniel膊頭,似乎好滿意呢位女婿。

去年十一月本刊揭發,王君馨同 Daniel以同一地址入紙註冊。

臨走前 Grace爸爸拍一拍女婿膊頭,似乎感情唔錯!

週一, Grace出席活動承認已經同 Daniel簽紙完婚。

秘密註冊

入行十年, Grace終於憑住《城寨英雄》飾演「花曼」一角成功發圍,無綫當然咬住唔放,啱啱拍完新劇《超時空男臣》, Grace拍住視后田蕊妮做女二,事業有起色,婚姻大事都要讓路,惟有先註冊後行禮。

不過,據知在上月 Grace同 Daniel已經秘密註冊,當時只有雙方家人,未有邀請圈中人出席,稍後舉行教堂行禮,才會正式公布已婚。最近 Grace出席好姊妹陳明恩婚禮時,都表示婚禮日期仍然未有定案。

「咁難得等到機會, Grace梗係想食住個勢,唔敢推劇,啱啱先拍完套《超時空男臣》,拍足四個月,下個月又要宣傳套《心理追兇》,都未有時間籌備婚禮。」 Grace身邊人透露。

週一(十三日), Grace出席影視博覽時,承認已和 Daniel秘密簽紙:「我哋其實一早簽咗紙,但因為我哋係基督徒,所以要行禮先叫做真正結婚,註冊對我哋嚟講唔算係結婚。」但被追問婚禮日期, Grace就笑住話:「今年喇!」

入行十年,王君馨去年終於憑住《城寨英雄》飾演「花曼」一角跑出。

新劇《超時空男臣》, Grace拍住視后田蕊妮做女二。

去年尾, Grace同 Daniel搞訂婚 party,好姊妹鄧萃雯、岑麗香等都有出席。

由王君馨、李亞男、鍾嘉欣、岑麗香同苟芸慧組成的「處女黨」,而家嫁剩苟姑娘。

撰文、攝影、攝錄:娛樂組


鍾意就快D Share啦!