多一瓣賺錢！
（設計對白）
娛樂偵訊
興趣變後路 林子善考健身教練牌
林子善去年向圈外女友 Kary求婚成功，定了明年四月結婚及擺酒，為有更穩定的生活，林子善除拍劇兼開了三間茶餐廳搵錢外，據知迷上健身的他最近更上堂考健身教練牌，密謀將興趣變一條搵錢門路。
天后趕上堂
兩年前，林子善以六個月時間操到變爆肌男，從此迷上健身 keep住操。早前，本刊在天后見到林子善急步走入一間新開的健身店，以為他去健身，原來是趕住上堂。據知，林子善報考健身教練牌的課程，每星期也要上堂，課程讀幾個月，才可考教練牌。
身兼三瓣嫌未夠
結婚要使唔少錢，加上林子善為給老婆一個安穩的家，身兼三瓣仍繼續鋪後路，「拍劇收入唔多，雖然有三間茶餐廳，但做生意嘅嘢好難講。佢好勤力，除咗落手落腳返茶餐廳打點外，好多內地夜場騷或搵佢去捽碟嘅演出都做，最緊要係有錢搵！好似考健身教練牌咁，佢都係想有多條路搵錢。」林子善身邊友人說。
有人敲門搵佢教
事後問林子善是否要賺錢娶老婆才去考健身教練牌，他說：「考健身教練牌唔係主力做教練，我真係鍾意健身，想正正經經咁學個健身課程，咁多年嚟好多人問可唔可以教佢哋，我都話我唔識嘅，我冇一個正式嘅牌照冇張 cert，如果有個公認嘅牌照，有時間可以教吓。婚後我都想生活再好啲，當然可以去試吓教人，係另一條搵錢門路，又可寓工作於娛樂。」
免費操馬明
雖然未考牌，已有人敲門，但藝人客，林子善話自己友，免費教授！「街外及藝人都有，但街外客戶多啲，藝人因為好多本身都已有自己嘅教練或 sponsor，除非啲 friend搵我。好似大哥嘉穎（鄭嘉穎），佢都好 fit，第日有咩需要搵到我，我都會話佢知。馬明（馬國明）如果要操嘅我都可以幫，呢啲兄弟班就一定係唔收錢啦。」
私人教練好好搵
近年愛上健身的人愈來愈多，有市場下，考牌做教練的人亦相繼增加。據知，初入行做教練的人會先到一些大型健身中心工作，擔任初級教練取經，每月底薪近萬元，另加佣金。累積一定經驗及客戶後，就可自立門戶當私人健身教練，時薪達$500或以上，假若能成為星級教練，時薪更可高達$2,000。好似羅樂林女婿、前港男陳志健（圖），收費要$2,000一個鐘，星級客人包括黃宗澤、李思捷及錢嘉樂。
撰文、攝影、攝錄：娛樂組
|
鍾意就快D Share啦！
|
|
|
