掃呢頁CODE去手機

2017年3月9日 星期四

《溏心 3》日踩夜踩 失聰李司棋捱到爆裂 [壹週刊 - 1409] __,李司棋,M1,

李司棋同夏雨正式埋位為《溏心3》開工,但開工無耐司棋姐已盡現疲態。探熱針《溏心3》日踩夜踩 失聰李司棋捱到爆裂李司棋回巢大台,與最佳拍檔夏雨及關菊英這 ...


李司棋同夏雨正式埋位為《溏心 3》開工,但開工無耐司棋姐已盡現疲態。

探熱針

《溏心 3》日踩夜踩 失聰李司棋捱到爆裂

李司棋回巢大台,與最佳拍檔夏雨及關菊英這個鐵三角組合合作重頭劇《溏心風暴 3》,但原來今年初司棋姐左耳突然因為神經退化了四成,左耳已失聰。

病住拍劇的司棋姐,每日朝早外景接夜晚廠景,工作十幾個鐘,劇集開拍才三星期,六十六歲的她已經捱到殘樣暴現。

唔辭演頂硬上

九九年曾患過子宮頸癌的李司棋,經過一年化療、電療及切除手術,終於戰勝癌魔,但在接受治療期間又出現骨枯情況,有幾年時間她要撐住枴杖生活。以為身體情況穩定,點知今年初司棋姐突然發現左耳因為神經退化四成,而變成零聽覺。

其時,司棋姐已答應接拍無綫新劇《溏心風暴 3》,再一次與最佳拍檔夏雨及關菊英合作,可以重組經典組合,不想放棄的司棋姐,並未有因為耳疾而錯過機會,決定頂硬上。

上月中,四十集的《溏心 3》正式開機,由於要在五個月時間內完成拍攝,劇中主要演員包括司棋姐的通告,都安排得相當密,每日晨早拍外景,傍晚時間返電視城拍廠景,日日直踩十幾個鐘頭;雖然劉家豪事先曾承諾一定會讓幾位一把年紀的主角,有充足時間休息,但由於司棋姐、夏雨及菊姐佔戲重,角色貫穿劇集每一條線,所以根本無法編排出一個有虛位的期表,讓這個鐵三角組合喘口氣。

99年司棋姐患有子宮頸癌,其後又引發骨枯情況,需要撐枴杖一段時間。 (《蘋果日報》圖片)

雖然是炒冷飯,但《溏心》這個經典組合,相信仍吸引唔少觀眾。

本週二,司棋姐同陳敏之一齊拍外景,敏之對司棋姐照顧周到。

失聰仍有水準

日前,司棋姐與夏雨現身上環海味街一帶拍外景,未埋位,司棋姐已經疲態盡現,無厘神氣到連眼都睜不大,攰爆的她要扶住欄杆借力支撐身體,一拍完,又要即刻搵櫈坐低休息。不過,失聰似乎未有影響到她的表現,只見司棋姐同對手夏雨交流得好好,未有出現因為聽唔到,而接唔到對白情況,但有時同導演傾偈,司棋姐就要哄近對方才聽得到。

記者上前訪問,司棋姐的確有聽不清楚的情況,記者要講多一兩次,她才聽得到!

「而家喺好嘈嘅地方,我就聽唔到,但係靜嘅環境我就唔怕,因為另外隻耳仔好㗎嘛!(有冇影響工作?)而家冇囉!如果去好嘈例如街市,好多人講嘢嘅地方就唔得。(醫生有冇話可以康復?)醫生話會好慢,但我會試。好多朋友都好幫我,介紹好多方法,但我真係冇時間。(日接夜開工?)呢排都拍得密。」司棋姐說。

雖然司棋姐左耳失聰,但冇影響演出,同夏雨好有交流。

導演講解劇本時,司棋姐要哄埋先聽到。

司棋姐一唔使埋位就搵地方坐低休息,睇睇吓劇本又要閉目養神。

因為要拍劇關係,司棋姐表示未能戴耳機,要拍完套劇後,先有時間去訂造耳機。

陳豪成磨心 內鬥變搶人 嚴重缺人

除了《溏心 3》外,近期無綫一口氣開了幾部大製作,包括梅小青的《宮心計 2之深宮計》,以及五十周年台慶劇《誇世代》;由於有知名度又有收視保證的小生花旦走得七七八八,變成有搶演員情況出現,當中陳豪就成為磨心,被捲入一班高層內鬥。

連開三部重頭劇,是大台近年難得一見場面,佘詩曼、胡杏兒、楊怡、林峯及鄭嘉穎等人全部走晒,連鍾嘉欣都掛住湊女唔再接劇,出現鬥搶人情況,實在無法避免。

據知,劉家豪一年前已籌謀回巢開《溏心 3》,除了一早斟掂夏雨、李司棋及關菊英這個鐵三角組合一齊班師回巢,更 mark定陳豪檔期,務求以最原裝的陣容拍第三集,其時,陳豪亦答應一定接。

不過螳螂捕蟬,黃雀在後!珍姐(曾勵珍)收到風後,即刻出手攔截。

「幾年前家豪哥同小青姐都係因為成日俾珍姐㩒住,所以先會離開公司走人去 now,今次老細李寶安同杜之克叫佢兩公婆返嚟,職位同珍姐一樣,大家咁高咁大,珍姐條氣梗係唔順!明知道《溏心 3》同《深宮計》都喺呢段時間開,佢都仲搞多部大嘢出嚟同佢哋對撼,打正五十周年台慶劇招牌,所以《誇世代》用晒目前公司嘅視帝視后級小生花旦,除咗陳豪,仲有歐陽震華、田蕊妮同埋近期因為《親親我好媽》出晒位嘅江美儀,珍姐仲親自出面,搵張衞健三月底回巢拍《大帥哥》,擺明要晒冷!」一名大台幕後說。

高層杜之克(右)親自搵劉家豪同梅小青回巢,更安排他們與珍姐同級,因此引發他們之間權力鬥爭。

陳豪夾在珍姐及劉家豪夫婦之間,最後被迫要拍《誇世代》,而放棄演出《溏心 3》。

《溏心 3》走剩黃宗澤呢個年輕一輩原裝演員,所以在今輯他終於坐正做男一,拍住新加入的黃翠如。

原本江美儀不屬於珍姐黨,但因為《親親我好媽》收得,即被珍姐重用,在《誇世代》中戲份甚重。

歐陽震華同田蕊妮兩大叫座實力派演員被珍姐收歸旗下,在《誇世代》中擔正男女主角。

為了挽回面子,珍姐更親自搵離開大台二十年的張衞健回巢拍港劇。

外援充撐

陳豪夾在高層內鬥間,最後迫於無奈答應留低幫珍姐,沒有了陳豪,《溏心 3》的黃宗澤大幅度加重戲份,成為最大得益者。

由於大部分演員都被珍姐的《誇世代》 hold起檔期,劉家豪和梅小青只有搵外援幫手,包括已多年沒有拍大台劇的唐文龍、星 B梁浸浸阿媽 Yumiko(鄭希兒)及隱退多年的苗可秀等。

至於《深宮計》情況更甚,除了女主角胡定欣是大台自己人,主要角色劉心悠、周秀娜都是借將;而一眾配角,亦搵來羅霖、張慧儀和陸詩韻等回巢幫拖;唔夠人用,情況嚴重到要動用大量棄將。

《誇世代》幾乎動用全台藝員演出。

麥明詩被珍姐睇中,連續在幾部大劇中有份參與。

梅小青同劉家豪兩公婆多年來都力捧陳豪,絕對稱得上是他的伯樂。

配角都唔夠人用,所以搵來羅霖同張慧儀這些好耐冇拍劇的過氣藝人幫拖。

《深宮計》六個主角中,得胡定欣、馬國明及蕭正楠係親生仔女,劉心悠、周秀娜及馬浚偉都是外援。

撰文、攝影、攝錄:娛樂組


鍾意就快D Share啦!