網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2017年3月22日 星期三

5月蟹咒!秋官發盈警 股民睇路 __,秋官,鄭少秋,

睇路呀喂!出事喇!雖然呢期股市暢旺,恒生指數創一年半新高,但各位睇路呀!事關「跨世代男神」鄭少秋,鎖定5月同大家慶祝佢出道50周年!以往冇秋官作品推出 ...


睇路呀喂!

出事喇!雖然呢期股市暢旺,恒生指數創一年半新高,但各位睇路呀!事關「跨世代男神」鄭少秋,鎖定5月同大家慶祝佢出道50周年!以往冇秋官作品推出嘅5月,市場已經有「Sell in May and go away!」、「五窮六絕七翻身」等共識,今年「逢七必災」撞正「丁蟹效應」,兩大魔咒拍門,個市會點?睇怕北海道名物「熊出沒注意!」都係唯一答案!

講真,Nuts哥對秋官冇任何不滿,即使有人統計過,「丁蟹效應」超過30次中到應一應,但作為成熟嘅投資者,Nuts哥冇怪秋官,因為投資人士除咗Call之外,係可以Put㗎嘛!比起「丁蟹效應」,Nuts哥更加相信「你要坐Benz靠自己個腦!」乜都賴,秋官餵埋你食好唔好?

風流倜儻型足50年

其實秋官呢位N世代男神認真厲害,由1967年同陳寶珠合作首部電影《黑煞星》,到50年後嘅今日,由排骨秋、大俠秋、扮嘢秋到丁蟹秋,佢依然不言休!無論扮演張無忌、楚留香、陳家洛定乾隆,秋官都係咁風流倜儻,據講佢為咗一個眼神,可以練足半年,為求動作瀟灑儒雅,甘於對鏡不斷練習,難怪冧盡兩岸三地萬千少女心!現實中嘅佢仲經歷三段婚姻,俘虜咗金牌司儀同台灣女星,即使秋官今天已年屆70,但唔使人扶,唔使撐拐杖, 兼夾仲保持到體態與狀態魅力無限,好似太陽咁溫暖,試問當今娛樂圈有幾多個有咁嘅魔力?

當然,扮過澤田研二、米高積遜、郭富城嘅秋官,扮嘢才華唔簡單,但最令Nuts哥寫個「服」字嘅係,做慣大俠嘅佢後來一轉戲路,演活咗野蠻暴戾、滿口歪理、無賴中嘅無賴-丁蟹!雖然香港今時今日滿街都係蠻不講理嘅丁蟹,但當年根本冇辦你跟,不過秋官依然將呢個角色演成經典,事實上,要遊走於正邪之間,演大俠與演無賴都拿捏精準絕非易事,就如小說家卡夫卡講過:「邪惡太了解善良,但善良毫不了解邪惡。(Evil know of the good, but good does not know of evil.)。」本名黃可忠嘅鄭少秋,曾被同父異母妹妹黃晴雯爆料:「他知道我媽身體不好,特別請人幫我媽按摩、治療」、「他到台北拍劇,特地趁空檔請我和母親到飯店聚餐」,百善孝為先,可想而知,秋官當年演丁蟹下過一番苦功!

唔信邪隨時「望鄉」

雖然秋官講明唔識唱乖女鄭欣宜嘅大熱金曲《女神》,但呢位「跨世代男神」大把名曲,完全應付不同場合需要,好似新年應景要唱「年年歡樂,歡樂年年」,劈酒Happy當然唱爆「飲勝咁至醒」,如果熊年殺到埋身,秋官一樣有歌唱到,嗰首熱爆《香港料理》就有句:「不如儲錢過二千年囉!」呢句絕對充滿大智慧,佢唔係叫你揸貨過2000年,注意不是Year 2000年,而係2000 Years,講嘅係數字唔係年份,咪以為揸住唔放就得,佢係勸你喺高位要識先行沽貨食胡,袋袋平安好過,跟手數住銀紙等睇「丁蟹效應」有幾靈!之後又喺低位入番,咁至可以搵到二千年嘅錢嘛!至於唔信佢嗰套、特別唔信邪嘅股民,揸住成倉蟹貨,搞到入秋都返唔到家鄉,到時想唔唱《天涯孤客》嗰句:「秋深倍念家鄉,最斷腸!」都唔得


來源 source: http://hk.on.cc
鍾意就快D Share啦!