娛樂偵訊
由揸咪到揸畫筆 62歲麥潔文自通開畫展
62歲的麥潔文，橫跨唱歌事業三十多年，但到了「登六」的歲月後，仍有本事開創另一段人生。美術科曾是她求學時期的強項，近年揸咪之餘，揸埋畫筆，仲畫到開畫展，做畫家。人生下半場，是沉悶還是充滿色彩，其實睇你想點！
江華投訴變點醒
一三年，麥潔文因為老公江華一句說話，重拾幾十年冇攞起過的畫筆。
「仔女大晒我好得閒，老公投訴我成日掛住打機！又係喎，唔好咁頹廢，於是畫番畫，又真係幾好喎。本來想去學油畫，但我份人唔鍾意被規範框死，喜歡 crossover，一幅畫會用水筆、木顏色甚至毛筆畫成。所以朋友問我係邊個派別，我講唔到，冇派別。」麥潔文說。
夫妻情浪漫系列
無師自通，靈感高峰期可以一個月畫十幅。三年時間儲下八十幅作品，又因老公一句話：「你啲畫好靚，可以開畫展」
一個讚賞變成一個夢想，畫展本月底舉行，麥潔文嚴選了四十幅作品示眾，夢想變成現實。
展品之中，包括由昔日畫給老公的心意咭演變成的浪漫系列「球琪戀」！一對球體戀人永遠孖公仔，長相廝守的故事，蘊藏着夫妻關係細水長流的寫照。
「感情觀方面，我比較偏向白頭到老，天長地久嘅想法，所以『球琪戀』代表成雙成對，好恩愛。」
無法經營的完美
畫展另一系列「 Lockman」創傻氣人物，也是麥潔文對丈夫的一種投射。
「故意將佢創作成大細眼，想表達人唔可以完美，所以要學識接受唔完美，好似我腳粗，你笑我腳粗咪腳粗，大細眼都係個人特色。」
麥潔文看得透，但她的另一半卻是完美主義者。
「我錄歌，只求盡善盡美而非完美，例如有啲人未必聽得出嘅少少走音位，只要唔過分，我唔會改。但我老公試過一路聽我錄音，一邊 mark晒啲唔完美嘅位，然後不停咁改，但到最後都係覺得效果唔完美，就唔開心。不過佢叫我開畫展，我話啲畫咁渣，唔係咁完美喎！點知佢話：『唔係喎，我覺得好完美！』所以完美根本冇準則，唔需要刻意追求。」麥潔文畫住她創作的 Lockman說。
婚姻寫照：球琪戀
「我送俾老公嘅畫就係畫呢啲，男嘅叫阿球，女嘅叫阿琪。呢幅係我第一幅創作嘅『球琪戀』系列作品。我鍾意畫波波，所以畫中有冷球、桌球，名堂係波場邂逅，係阿球同阿琪嘅開始，白頭到老嘅都有。」
Kitman投射的 Lockman
麥潔文創作的卡通人物「 Lockman」大細眼，永遠咧嘴笑，是她樂天性格的投射，亦是外表 Cool爆兼夾是完美主義者的老公江華對照。
撰文、攝影、攝錄：娛樂組
場地提供：小房子
|
鍾意就快D Share啦！
|
|
|
