掃呢頁CODE去手機

2017年3月9日 星期四

娛樂專題:屈機人妻李亞男貼地遊街市 __,李亞男,

今日李亞男帶你殺入街市!藝人李亞男與老公王祖藍近年在內地發展,樂於做跟得夫人的她,對老公起居飲食照顧得無微不至,日前更殺入大埔區買餸餵飽老公,入得廚房 ...


今日李亞男帶你殺入街市!

藝人李亞男與老公王祖藍近年在內地發展,樂於做跟得夫人的她,對老公起居飲食照顧得無微不至,日前更殺入大埔區買餸餵飽老公,入得廚房出得廳堂的亞男獲老公封為「萬能老婆」。講到生育大計,亞男坦言老公工作安排到2018年,希望現時先享受二人世界,之後才開始造人大計。

街坊興奮爭集郵

「索爆人妻」李亞男自下嫁王祖藍後幸福美滿,早前祖藍豪擲1.14億元購入大埔白石角逸瓏灣豪宅作愛巢,更將物業歸亞男名下,認真羨煞旁人。身為「大埔人」的她對老公的起居飲食絕不假手於人,經常行街市買餸,與街坊打成一片。日前她帶大家行勻大埔買餸,她說:「我老公每日都要飲一杯鮮榨嘅蔬果汁,所以我久唔久就要落街市買啲新鮮嘅蔬果,同埋我奶奶都成日嚟呢度買餸架。」雖然今次落區短短15分鐘,不過向來人氣勁的她甫入街市已成為焦點,吸引不少途人興奮集郵,她亦無任歡迎盡顯親民一面,更有人大讚她真人夠高夠上鏡。

五音不全學唱歌

近年王氏夫婦主力在內地發展,每當祖藍參加內地節目,都見亞男擔任嘉賓,她稱一切都是老公的主意:「佢會邀請我做嘉賓,無論係唱歌定跳舞乜都會做吓,好開心佢嚟緊都會有個演唱會,喺北京水立方嗰度搞,係佢喺內地第一個個人演唱會,我都好為佢感到驕傲。」亞男當然有份擔任表演嘉賓,她坦言現時跟杜麗莎學唱歌,除教她音樂知識外,更會教做人道理,令她獲益良多。亞男稱:「同老師上堂好正,唔只上音樂堂,佢仲會教你喺舞台上表演技巧,點樣enjoy去釋放自己,將每一首歌去表達,同埋佢教我好多人生道理。(話你有天分?)幾年前我覺得我唱歌係五音不全,咁佢同我講:『That's OK , Wonderful , I think you know what you are doing.』佢畀我好多正面嘅能量我,佢唔會話你走音就係你問題,佢都講過佢都會走音,佢畀好多鼓勵我,令我覺得自己可以唱到歌。」

忙工作生B拖住先

雖然亞男與祖藍只是結婚兩年,但已不時被追問造人大計,她坦言想好好享受二人世界,才迎接新生命的來臨。她說:「我老公佢好忙,佢啲期至少排到2018年,我都唔知佢幾時得閒,順其自然啦,但今年都想靜靜哋二人世界,因為啱啱兩個人搬咗出嚟住,都想享受吓先。」她坦言搬新屋後,只請鐘點工人,希望可以親力親為照顧老公:「可能我鬼妹仔性格,唔係好慣屋企有好多人,唔慣有人幫我執底衫褲,自己搞掂自己嘅嘢比較好。其實我父母喺我細細個都培養我洗衫打掃,所以都好拿手。我老公都成日讚我,話我呢個老婆係萬能,入得廚房出得廳堂,仲可以行紅地氈添。」

不見兩月險抑鬱

亞男婚後鮮有拍劇,令一班網友大呼十分掛念,她坦言有拍劇癮,現時靜待好劇本:「自從結婚之後都成年幾冇拍,依家都係等緊好嘅劇集,睇吓老公安排。我係好隨意嘅,有咩我就會努力去做。(有冇同老公爭取?)我份人就唔係好識得爭取,百分百信任佢,知道佢幫我安排一切都係最好嘅,其實我可以再進取嘅。」雖然亞男未有拍劇,但樂意做個跟得夫人,她認為不可能與老公不見面一星期,並自爆祖藍試過在內地拍劇逗留兩個月,令她差點抑鬱:「試過佢結婚冇耐就返內地拍《哪吒與楊戩》,成兩個月冇見過,我幾乎有啲抑鬱,好唔開心,點解結咗婚冇見呢?(有冇去探班?)有嘅,但又好難每星期飛一轉,所以都盡量安排兩個人去工作。(所以成日見你兩個孖公仔?)係呀,如果唔係佢就成日都喺內地。(做跟得夫人?)都係嘅,好多人問我會唔會好緊張佢身邊係咪有好多狂蜂浪蝶,其實我身邊有好多針幫我睇實佢。」

唔同性格補長短

兩人婚後總是離不開幸福與開心,最難得是原來從不鬧大交,令大家由內到外都感受到亞男的幸福:「我都覺得佢由拍拖到依家都好錫我,係有增無減。係有陣時會覺得佢好忙,有啲細節會忽略咗,我都話畀自己聽,我唔可以要求咁多,個老公又識賺錢又要幫我安排咁多嘢!我哋嘅角色係我去安排日常生活,佢就係去賺錢。我哋兩個性格就係可以互補不足,佢份人急啲,可以處理大型事件,令我唔需要擔憂;而我份人比較有耐性,我就可以處理啲瑣碎事務。(有冇試過鬧大交?)冇可能鬧到住,一嚟唔係成日見,二嚟我唔係好識鬧交,同埋大家如果講咗難聽說話就好傷感情,所以都唔會鬧交。我哋都試過冷戰,但隔咗唔係好耐時間就會好番,互相say sorry。」

場地:Cafe Swan

服裝:Kate Spade

髮型:Nicole Yip@ii hair&nail

東網已全面支援360影片及相片,讓你全方位睇盡新聞大事,恍如置身現場,立即登入東網360網頁: http://on.cc/360/

如仍未更新東網App,請按此連結收睇360影片:

https://goo.gl/guAOxe


來源 source: http://hk.on.cc
鍾意就快D Share啦!