今期流行，唔使古天樂唱畀你聽都知如果你答係孔劉、狼人曉積文，甚至係睇住吳業坤跳樓、見死不救嘅田蕊妮都好，佢哋又點夠「香港拳王」曹星如（Rex）紅呀？呢位「神奇小子」，幾日前打贏日本拳手向井寬史攞到21連勝，呢勻堅係全城興奮！連超級明星嘟姐（鄭裕玲）、丹爺、阿倫、吳彥祖都變晒小Fans，曹星如已唔只係明星喇，簡直係星中之星！
究竟曹星如有咩魅力，可以收服呢班Super Stars？當然係因為有成績啦，佢依家上到WBO（世界拳擊組織）超蠅量級世界第一，打拳又夠晒有型喎，Fans唔多就奇啦。呢次佢上擂台，要到凌晨12點過後先出場，但嘟姐一樣睇晒全場，就知佢有幾迷阿Rex大家都知，嘟姐一向鬼咁健康，話到明夜晚9點就要上床覺覺豬㗎喇，但為咗捧曹星如場，乜嘢生活規律都唔記得，仲要食晒「阿Rex全餐」！
翹到實當正男友
賽前先搵偶像集郵，繼而同阿Rex攬攬，之後仲主動翹住拳王隻手影相添。睇真啲，嘟姐個身黐到阿Rex隻手實一實，笑到成個少女咁款，如果嗰陣開口唱埋《女校男生》：「插班生甲，動作很星如」，真係完全啱晒Feel，一啲違和感都冇。
嘟姐放番阿Rex上擂台，佢就做番小Fans喺台下打氣，到拳王贏咗喇，就即刻擺偶像張相上IG，留咗句充滿感情嘅「Winnnnnnnn ！」好似見到男友考第一咁。到第二日嘟姐仲搵曹星如經理人，同佢師弟潘啟情上自己個電台節目做訪問，堅係汁都撈埋。
查實當晚除咗嘟姐外，克勤、曾江、張達明、谷德昭及任達華（華哥）都係座上客。注重健康嘅華哥一樣眼都唔眨撐到尾，仲做埋阿Rex嘅星級攝影師。華哥影相不嬲有水準，冇幾多粒星可以請得郁佢！第二日，連甄子丹都專登發短訊畀拳王經理人，要佢向曹星如講恭喜，仲大讚呢個後生仔係香港之光。國際武打巨星同拳擊首席明星，堅係惺惺相惜。
曹星如旋風席捲全香港，真係抵佢上位。佢贏出之後，講嘅說話堅係得體：先多謝日本對手，之後唔只多謝支持佢嘅Fans，仲感激大家力撐同晚其他拳手。雖然已經被打爆個鼻流住血、企都企唔穩，但對Fans一樣勁親民，仲親自揸機同記者朋友大合照。如果當晚係喺紅館搞的話，阿Rex對住全場拳迷，真係會成晚影相冇得停呀！
狄龍視作親生仔
呢個後生仔，好打就唔使講㗎喇，但最得民心嘅，係佢唔會一朝得志語無倫次，無論再連贏幾多場，如果牙擦擦睇人唔起，最後只會眾叛親離成籮負皮。曹星如由只識打機嘅廢青，變做打不死嘅熱血拳王。血淚背後，無限溫情，狄龍一封利是，令佢諗起亡父昔日以平安利是作鼓勵打氣，子欲養而，萬千感慨！奮鬥史夠晒傳奇，依家佢有價有市，如果Nuts哥係電影公司老闆，就算天價都會搵佢做主角，整番套《曹星如傳》，到時大把天王巨星爭做串星，想唔賺大錢都難
|
鍾意就快D Share啦！
|
|
|
