今晚大台舉行年度慈善節目《博愛歡樂傳萬家》，出席歌手梗係大頭，有李克勤、C AllStar、周柏豪、梁漢文等，但論睇頭，點都唔夠中門大開、罕有地晒巨胸嘅王馨平咁搶。近日復出幕前嘅王馨平，平日斯斯文文、唔聲唔聲咁，點知今晚出大台騷時，突如其來嚟一襲中門大開，大晒甚少曝光嘅美乳突然見光，睇到真係嘩嘩聲！已經48歲嘅王馨平平日養尊處優，歲月唔係好係好喺佢面上留痕跡，最估唔到嘅係佢身材仲keep得咁好。佢唱出首本名曲《別問我是誰》，聽覺好享受，加埋佢臨尾鞠躬烏低身嗰一吓，視覺夠晒刺激！《蘋果》就問咗王馨平，做咩今次咁性感？佢就話：「大耐冇性感，大家都唔記得我可以性感係咪？講笑啫，其實係今次TVB個監製會落重本，喺個舞台、燈光、樂隊都會同以前好唔同，我覺得要尊重舞台同觀眾，所以件衫專登搵設計師朋友設計，佢幫我設計到咁性感，我都覺得好靚，都接受到。」講到老公有冇支持吓，王馨平就話：「當然有捐錢啦，但我冇問佢捐咗幾多，應該都唔會太少。」順帶一提，今晚王馨平個舊愛鄭嘉穎，以《風雲》5D音樂劇演員身份參演，而嘉穎個現任女友陳凱琳就做今晚司儀，唔知……佢哋3個有冇見個面，互相介紹吓咁呢？
來源 source: http://s.nextmedia.com
|
鍾意就快D Share啦！
|
|
|
